Read lubukusu Chiny. 44 Bible Online

Chiny. 44 - lubukusu bible

Chiny. 44

¹Lulwimbo lwe babaana ba Korai Ee Wele, khwauliile ne kamaru kefwe, bakuuka befwe bakhuboolele efwe, bikholwa nibio wakholanga mu ndaalo chabwe, mu ndaalo chichabira khaale,

²ewe wamwene khulwe bung'ali bwowo watimania chikholo, ne kakhali wesiao babaandu bowo, ewe waukuuma chikholo, ne kakhali waelesia bulekhuule babaandu bowo.

³Sikila se banyoola sibala khulwe bulwaani bwabwe babeene tawe, namwe se banyoola bukhili khulwe kamaani kabwe babeene tawe, ne kakhali khulwe bunyali ne kamaani kowo, ne bulayi bwe khubao khwowo, sikila ewe wabasiima.

⁴Ewe Omwami wase lundi Wele wase, Oelesianga[23] lulwibulo lwa Yakobo bukhili.

⁵Khubirira mwiwe efwe khuulaanga basiku befwe, khubirira mwisina liowo khuswalakililanga bakhwibwaakala efwe.

⁶Sikila se neyikine buyiingo bwase, namwe embalu yase khukhumbonia tawe.

⁷Ne kakhali ewe wakhuoniisie efwe khukhwama khu basiku befwe, ne khukoyaania abo ba bakhubiila efwe.

⁸Efwe khwachiililila khukhweyingila mu Wele, ne efwe khulikhupila orio ewe Wele buli lwoosi.

⁹Ne kakhali nono wakhwanjuukhe efwe lundi wakhulekhile efwe khuulwe, mala se okeendelanga alala ne banamae befwe tawe.

¹⁰Ewe wakila khwelukha basiku befwe, mala bekhwaasia kimiaandu kiefwe.

¹¹Ewe wakhola khwaba nga kamakheese kayilwa khusiinjwa, mala wakhusalanisia mu bibala.

¹²Ewe wakusia babaandu bowo wamwene khu bukusi butiiti, nga bakhalimo engaanga engali[24] tawe,

¹³Ewe wakhukholile efwe khwabeele sienya meno khu bachirani befwe, abo ba baaba embi nafwe bakhuchekha efwe ne khu khulekelesia efwe.

¹⁴Ewe wakhukholile efwe khwabeele chingacho akari we chikholo, khwabeele chinjekho akari we chikholo.

¹⁵Ese fwolobisibwa endaalo yoosi, ne khuambwa chisoni,

¹⁶khulwe kamakhuwa ke babaandu bakhuchekha efwe ne khu khukhoma efwe, khulwe khubona basiku befwe nende babeyacha khwifwe.

¹⁷Kano koosi kekholekhe khwifwe, akhaba ne khukhakhwibiliile ewe namwe khwafunaka endakaano yowo nafwe tawe.

¹⁸Se khwabeele bareengu khwiwe tawe, namwe khwalekha engila yowo tawe.

¹⁹Kakhaba kario ewe wakhulekha efwe ne khukhenyalila akari we chisolo, ewe wakhwanjukha efwe mu siilima sikali po.

²⁰Liba bali efwe khwalekha khusaaya Wele wefwe, mala khwasaba bawele Be Chikholo,

²¹ng'ali andi Wele ewe wamanya likhuwa elio, sikila ewe omanyile kamebaasio kaali mwifwe.

²² Ne kakhali basiku beenya khukhwira efwe biise bioosi sikila ewe, khubalwa nga kamakheese kaayilwa khukhwirwa.

²³Ee Wele Omunyali Owa Bioosi, sisimukha! Siina sikila nokona? Yinyokha! Okhakhulekha efwe buli lwoosi tawe!

²⁴Siina sikila ne wikisa khukhwama khwifwe? Siina sikila ne wibilila buchuuni ne butinyu bwefwe?

²⁵Sikila efwe khukhiliilwe khwakwa asi, efwe khwalambaalile asi.

²⁶Yinyokha, yiicha okhuyeete! Khulwe busiime bwowo bukhawa tawe khusikule efwe!