Read lubukusu Chiny. 45 Bible Online

Chiny. 45 - lubukusu bible

Chiny. 45

¹Lulwimbo lwe babaana ba Kora khu busiime Kumwoyo kwase kwechula kamakhuwa kamalayi, ese nimbila omwami lulwimbo luno, kumumilo kwase kuli nga omuandiki omulayi.

²Ewe oli ne lukoondo lulayi khukhila baseecha boosi, oli ne kumwalaalo kwe lulimi lulayi, khwako Wele, akhubiitanga ewe chikhabi buli lwoosi.

³Yee ewe owe kamaani, yirekekha ne mbalu yowo mu sibaabi, oli ne fuma ne lukoosi.

⁴Chiililila mu lukoosi lwowo khunyoola bukhili, khulwe khuliinda bung'ali ne buluungi![25] Kamaani kowo kalikhuelesia ewe bukhili bukali.

⁵Buembo bwowo bubwoki, bwira basiku bowo, chikholo chiba asi wowo.

⁶ Bubwami bwowo bwama khu Wele, buliio mindali na mindali, oruka babaandu bowo mu buluungi,

⁷wasiima buluungi ne khubiila bubwoni. Esio nisio sikila Wele, Wele wowo, ne akhurobore ewe, mala akhutasile ewe busangaafu bukali, khukhila babaami babaandi.

⁸Chingubo chowo choosi chiunya kamafura ke bukusi bulayi nende uti, babeembanga kimienya bakhwimbila ewe, mu machipi niko basaa ne kimisaanga.

⁹Bakhaana be babaami bali balala khu bakholi bowo be lukoosi, ne kwini owifwarire kamamili, ke esahabu emiliiu emile alubeka lwowo lwe kumukhono kumuseecha.

¹⁰Ee mukhaana ulila, yibaasia ne khureka liiru liowo, yibilila babaandu bowo ne balebe bowo,

¹¹ne omwami alasiima lukoondo lwowo, niye omwami wowo, khwako okhoya omurie.

¹²Babaandu ba Tiro balikhuelesia ewe biianwa, baiinda balienya khu khusiimisia ewe.

¹³Omwea wo mwami echa mwichipi, ali ne lukoondo lulayi! Engubo yewe yanabwa ne buusi bumelamela nga esahabu.

¹⁴Ayilwa niio omwami ali ne efwarire engubo eye kamatoa kamalayi, bakeesia bewe ne bamuelekesia, mala bosi balikho bayilwa niio omwami ali.

¹⁵Beecha mu busangaafu ne khoyo, ne khukhwingila mwichipi lio mwami.

¹⁶Ewe mwami wase, olinyoola babaana basoleeli bakali baakhabe babaami enyuma we bakuuka babwe, ne olibakhola babe baruki be sibala sioosi.

¹⁷Ndikhola lisina liowo lifumisibwe mu selukho choosi, khwako chikholo chilikhufumia ewe mindali na mindali.