Read lubukusu Chiny. 48 Bible Online

Chiny. 48 - lubukusu bible

Chiny. 48

¹Lulwimbo lwe babaana ba Kora Wele Omunyali Owa Bioosi ali omukali mala akhoyelwa afumisibwe lukali, mu lukoba lwewe, khu sikulu siewe sitakatifu!

² Sayuni, sikulu sia Wele sili sileeyi lundi sifwaana bulayi, lukoba lwo Mwami lureera ekhoyo eye mu sibala.

³Wele eyekeesie mu busire bwe lukoba ali niye ali buliindi.

⁴Babaami ne banamae babwe babuusiana mala becha khukhwibwaakala sikulu sia Sayuni.

⁵Nga babona lukoba lwa Sayuni, besiindukha, baambwa bireengo mala belukha.

⁶Bateremela abwenao ne khuchuunwa nga omukhasi oli embi khusaala.

⁷Baba nga ekhuungu khukhwama ebukwe, ne funiakaka chimeeli cha Tarishishi.

⁸Nga khwaulila, nono khwaboone, mu lukoba lwa Wele Omunyali Owa Bioosi owe bunyali, mu lukoba lwa Wele wefwe, nilwo Wele aliliinda buli lwoosi.

⁹Ee Wele, ne khuli mu Lukaangu lwowo, khukhebulila busiime bwowo bukhawa tawe khwifwe.

¹⁰Ee Wele, nga lisina liowo lili, efuma yowo yosi eli mu sibala sioosi. Mu bunyali bwowo okholanga bung'ali,

¹¹lekha babaandu ba Sayuni basangaale! Lekha babaandu be chingoba cha Yuda bekhoye, sikila bukhalaki bwowo bwa ng'ali!

¹²Keenda mu lukoba lwa Sayuni, lubotookhelele, bala chindeleelwa chalwo,

¹³menieelesia kamasiisi kalwo, lambuula chinju che khukhwekisamo chalio, nio muboolele eselukho eyiicha,

¹⁴muli yuno ali Wele, Wele wefwe owa mindali na mindali. Aliba omuliindi wefwe buli lwoosi.