Read lubukusu Chiny. 49 Bible Online

Chiny. 49 - lubukusu bible

Chiny. 49

¹Lulwimbo lwe babaana ba Kora Baandunywe, ulila kano mweesi! Rekeeresia, mumenyile mu sibala mweesi,

²babenyalila nende bakhenyalila boosi, baiinda alala ne babanani.

³Khalome ke limanya, kamebaasio kase kaliba ke bukesi.

⁴Ndebaasia chisimo, ne khukhwinoosia sifuno siacho, ne khupa lituungu.

⁵Siina sikila mbe ne buuri mu biise bie butinyu, basiku base ne bambotookheleele,

⁶babaandu babeyikina mu buiinda bwabwe, ne khukhwebonia khulwe bukali bwe kimiaandu kiabwe?

⁷Ng'ali se aliio omundu onyala omwene esikula tawe, namwe aelesia Wele kumuruungo kwe bulamu bwewe tawe,

⁸sikila kumuruungo kwe bulamu bwewe kuli kumukali lukali, Nisio omundu anyala aruunga se siolaana tawe,

⁹achiililile khumenya buli lwoosi, ne khuloba khufwa tawe.

¹⁰Ng'ali alimanya ali akhaba be limanya bafwichanga, basilu ne bang'ang'aafu bosi bafwichanga, ne khulekhela babaandu kimiaandu kiabwe.

¹¹Biliindwa[28] nibio chingoba chabwe buli lwoosi, niio bamenya khu selukho choosi, akhaba babeene ne baba ne kimikuunda kiabwe.

¹²Mu buiinda omundu se amanya ali alifwa tawe, ne kakhali alifwa busa nga chisaang'i.

¹³Lino nilio liliekholekha khwaabo baali ne lilieyikina lie busilu, sisiakamo siabo[29] babebonia khulwe kimiaandu kiabwe.

¹⁴Bali nga kamakheese kayilwa khukhwirwa, lifwa liliba omwaayi wabwe, balisiikhwa abwene ne abwene mala babole. Emakoombe eliba lukoba lwabwe.

¹⁵Ne kakhali Wele alimbukula ese, alimbonia ese khukhwama mu bunyali bwe lifwa.

¹⁶Okhaba ne liaayaaya omundu ne aindiaala tawe, akhaba kimiaandu kiewe ne kiba kimikali tawe,

¹⁷sikila ne alifwa se alicha na siindu tawe, kimiaandu kiewe se kilimuloondakho tawe.

¹⁸Akhaba ne ebukula khuba bulayi ne ali omulamu, ne akhaba omundu ne anyoola efuma ne ekholela omwene kamalayi,

¹⁹alicha emakoombe niio bakuuka bewe boosi bali, niio sisiilima sili buli lwoosi.

²⁰Mu buiinda omundu se amanya ali alifwa tawe, ne kakhali alifwa busa nga chisaang'i.