Read lubukusu Chiny. 5 Bible Online

Chiny. 5 - lubukusu bible

Chiny. 5

¹Lulwimbo lwa Daudi Ee Wele Omunyali Owa Bioosi, rekeeresia kakaase, ulila khusikhiikha khwase.

²Ulila khulila khwase unjeete, oli Wele wase, lundi omwami wase, sikila ese khusabanga ewe.

³Ee Wele Omunyali Owa Bioosi, mu mabwibwi oulila kumumilo kwase, mu mutikhinyi mbaana lisaba[3], ne khuliinda ewe ungobosie.

⁴Sikila ewe soli Wele osangaalila bubwoni tawe, ewe sofukiililanga be bubwoni tawe.

⁵Se wikhaliilikha babaandu babebonia ebweeni wowo tawe, babaandu be bubwoni boosi ewe wababiila.

⁶Ewe obunia abo baloma bubeeyi, Wele Omunyali Owa Bioosi abiila babeeri ne babeeyi.

⁷Ne kakhali ese khulwe busiime bwowo bukali, ndingila munju yowo, ne liria likali, ndikhusaayila mu Lukaangu lwowo lutakatifu.

⁸Ee Wele Omunyali Owa Bioosi ndangirire mu buluungi bwowo sikila basiku base, kwalaasia engila niyo wenya ese nonde.

⁹ Sikila basiku base baloma kakhasuubilwa tawe, benya khubunia khwong'ene. Chilomo chabwe chili luriimba nilwo barekire, bareka babaandu khulwe kamakhuwa kabwe.

¹⁰Ee Wele, khalakila basiku base mala obauukuume, lekha babune khulwe kimireko kiabwe babeene, batimanie sikila bubwoni bwabwe bukali.

¹¹Ne kakhali lekha abo boosi banyoola buliindi mwiwe bekhoye, lekha bembe khulwe khoyo buli lwoosi, ne khusaba obaliinde, nio abo babakhusiima ewe bekhoye mwiwe.

¹²Wele Omunyali Owa Bioosi, ewe obiita baluungi bowo, wabasiima, ne khwako obaliinda lukali nga engabo.