Read lubukusu Chiny. 50 Bible Online

Chiny. 50 - lubukusu bible

Chiny. 50

¹Lulwimbo lwa Asafu Wele Owe Bunyali Bwoosi, Wele Omunyali Owa Bioosi alomaloma, alaanga babaandu be mu sibala sioosi khukhwama ebukwe khukhwola mumbo.

²Wele akhosia mu lukoba lwa Sayuni, lukoba luli ne lukoondo lulayi lukali.

³Wele wefwe alikho echa, se asilile busa tawe, kumulilo kupupukhila ebweeni wewe, embembeesi eye kamaani yamubotookheleele niye.

⁴Alaanga likulu ne liloba bibe nga baloli bewe, nio akhalakile babaandu bewe.

⁵Aloma ali, “yiicha alala niio ndi basuubilwa base, abo babakhola endakaano nase, khulwe khuana embosio khwise.”

⁶Likulu lilangilila buluungi bwa Wele, sikila Wele omwene omukhalaki.

⁷Baandu base rekeeresia mala ndomalome, Isiraeli, ndarusia buloli khubabiiya enywe. Ese Wele, Wele wenywe.

⁸Se ndikho mwikiicha enywe khulwe chimbosio chenywe, ne biianwa bienywe bibiosie nibio mumbechanga buli lwoosi tawe.

⁹Se neenya chiuunwa khukhwama mu mataala kenywe, namwe chindurume khukhwama mu matuuli kenywe tawe.

¹⁰Sikila buli esolo eye mundaa eli eyase, ne chikhaafu chili khu ngulu chielefu.

¹¹Ese manyile chinyuni choosi, ne bioosi bikeenda khu lukoongo bili bibiase.

¹²“Mba ne njala, andi se nenaanile khubaboolela enywe tawe, sikila sibala nende bioosi bilimo bili bibiase.

¹³Ese ndichanga chinyama che chiuunwa, namwe nywa kamalasile ke chimbusi ku?

¹⁴Lekha khu khuupila ese Wele[30]orio khube chimbosio chenywe khwiwe, ne khukholela ese owe Angaaki Lukali koosi niko mwelakana khwise.

¹⁵Mu biise bie butinyu sabe ese, ndimusikula enywe, mala mukhafumie ese.”

¹⁶Ne kakhali Wele areeba babooni ali, “Siina sikila ne mubala busa kamalaka kase? Siina sikila ne mulomaloma busa khuloondekhana ne ndakaano yase?

¹⁷Sikila se mwenya mbakololosie enywe tawe, se mwasiima kamalaka kase tawe.

¹⁸Enywe ne mubona omwifwi, mufukiilisiana naye, lundi muambaana ne baeeyi.

¹⁹“Mwerekekha biise bioosi khuloma kamabi, ne se mukhiinganga khuboola bubeeyi tawe.

²⁰Mwikhala khuloma kamabi khu wandaayenywe, mukuta omwana owa maawenywe.

²¹Mwakholile kano koosi ne se nang'amulekho siindu tawe, nio mwebaasia muli ese ndi nga enywe? Ne kakhali nono ese mwikiicha enywe, mala napile likhuwa lino ebweeni wenywe.

²²“Rekeeresia kano enywe mukhambukulamo lukeendo tawe, busa ese ndababunia enywe, ne se alabao olabaonia enywe tawe.

²³Khu khupila ese orio niyo embosio ekobosia luyali khwise, ne ng'ali ndionia boosi baulila kakaase.”