Read lubukusu Chiny. 51 Bible Online

Chiny. 51 - lubukusu bible

Chiny. 51

¹Lulwimbo lwa Daudi enyuma wo omung'oosi Nasani khumurafwira khulwe bueeyi bwewe ne Batisheba Ee Wele, kholele siisa, khuloondekhana ne busiime bwowo bukhawa tawe, khuloondekhana ne siisa siowo sikali, rusiao bubwoni bwase.

²Siinge lukali nga osiinga engubo khukhwama mu bwoni bwase, ne khu khungwalaasia ese khukhwama mu bwoni bwase.

³Sikila ese manyile bubwoni bwase, lundi biise bioosi khebulila bubwoni bwase.

⁴ Ese nakhukholeele ewe bubwoni, nakhukholeele ewe weng'ene, ne khukhola kamabi ebweeni wowo, khwako oli ng'ali mu khukhalakila ese, oli na ng'ali khu khumbiiya ese.

⁵Lola, ne mbulwa naba ne bubwoni, ne nga naba munda mwa maayi naba ne bubwoni.

⁶Lola, ewe wenya bung'ali mu mwoyo, khwako njeyikie limanya.

⁷Rusiao bubwoni bwase, mala ndamiliia, siinge ese, mala ndaba omuwaanga nga kamaarara.

⁸Yichusia mwise ekhoyo ne busangaafu, lekha bikuumba nibio ewe ofuniakake biekhoye.

⁹Mbeele bubwoni bwase, ne khurusiao bubwoni bwase.

¹⁰Ee Wele, sosia kumwoyo kumukwalaafu mwise, mala ore liba liiya lundi lia ng'ali mwise.

¹¹Okhamboona khukhwama ebweni wowo tawe, ne okhandusiamo Roho wowo Omutakatifu tawe.

¹²Ngoboselie ekhoyo eye buonia bwowo, mala undeemo Roho wowo omulekhuule.

¹³Nio ndekisia bamayaanu kamalaka kowo, ne bamayaanu bakhakhukobolele.

¹⁴Mbonie[31] khukhwama khu sifuki sie babaandu, Wele ewe oli buonia bwase, ne ndilangilila lukali buonia bwowo.

¹⁵Omwami, njeete khulomaloma bulayi, ne ndikhufumia ewe.

¹⁶Ewe se wenya chimbosio tawe, andi nakhuelesie, biianwa bie khukhwosia se bikhusiimisia tawe.

¹⁷Embosio niio Wele afukiilila eli kumwoyo kukweboombia, Ee Wele, ewe se oloba kumwoyo kukweboombia ne khukhwekanila tawe.

¹⁸Ee Wele, kholela lukoba lwa Sayuni siisa mala oluyeete, yombakha lundi lisiisi lie lukoba lwa Yerusalemu.

¹⁹Nio osiimisiibwe ne chimbosio cha ng'ali, ne biianwa bie khukhwosia, ne chiuunwa chiliaanwa nga chimbosio khu alutare yowo.