Read lubukusu Chiny. 55 Bible Online

Chiny. 55 - lubukusu bible

Chiny. 55

¹Lulwimbo lwa Daudi Ee Wele, ulila lisaba liase, ne khusaba okhalangula tawe.

²Ndekeeresie mala unjeete, butinyu bwase bwaminyile.

³Birikhirisio bie basiku base binderemia ese, bukuulumi bwe babooni bwaminyile. Basiku base bandeerera butinyu, bali ne lirima khwise lundi bambiile.

⁴Ndi ne buuri bukali, biriisio bie lifwa binderemia lukali.

⁵Buuri ne khuterema biangwilekho, bireengo biaminyile.

⁶Lundi ndoma ndi, “Abaanga ndikho chindaa nga liuusi! Nakhapurukhe nacha mala nauluukha.

⁷Nakhapurukhe nacha aleeyi, mala namenya mu sichiimi.

⁸Nakhakholile khangu khunyoola niio nekhiinga ekhuungu nende embembeesi.”

⁹Ee Omwami, yonakaka kamarekekha ke basiku base, koyaania lilomaloma liabwe, sikila naboone sisiayuumba ne kamaaya mu lukoba.

¹⁰Siilo ne kumuusi kabotookhelela lisiisi lie lukoba, mala bumayaanu ne butinyu bili mu lukoba.

¹¹Bubwonaki buli buli abuundu mu lukoba, bukuluumi ne bubwifwi biechuule khu ngila che mu lukoba.

¹²Abaanga bali omusiku wase niye oukhoma ese, andi nefwiliisie. Abaanga bali omuyingani wase niye owebonia khwise andi namwibachile.

¹³Ne kakhali niwe, owasiase, niye khwamanyana, omusaale omusiime wase.

¹⁴Khwakachulanga bulayi nga basaale, ne khusaayila alala mu Lukaangu.

¹⁵Lekha lifwa litundubikhe basiku base, lekha beekhe emakoombe ne basiili balamu, bubwoni buli mu ngoba ne kimiooyo kiabwe.

¹⁶Ne kakhali ese saba Wele, ne Wele Omunyali Owa Bioosi alimbonia ese.

¹⁷Niloocha ne khulila mutikhinyi, mwiangilwe, ne akolooba, mala alimbulila ese.

¹⁸Alingobosia mu muleembe khukhwama mwiie, niko khupana ne basiku babanjibwaakala bakali bario.

¹⁹Wele, oorukanga khukhwama mindali, aliimbulila mala abaule, sikila balobile khukaluukhasia liba liabwe, mala se baria Wele tawe.

²⁰Owasiase ebwakaale basaale bewe, afuna endakaano yewe.

²¹Chilomo chewe chiseletekha bulayi khukhila liboonda, ne kakhali aba ne burangani mu mwoyo kwewe, lulimi lwewe lwaola khukhila kamafura, ne kakhali lukhaaba nga embalu eyokiia.

²²Lekhela Wele Omunyali Owa Bioosi busiro bwowo, ne alakhuyeeta ewe, se alifukiilila baluungi bakhilwe tawe.

²³Ne kakhali, ee Wele, olibamwaata mu ng'ani, babaandu babeeri ne babeeyi, se balimenya bakhalikhanie limenya liabwe tawe. Ne kakhali ese khare lilieyikina liase mwiwe.