Read lubukusu Chiny. 57 Bible Online

Chiny. 57 - lubukusu bible

Chiny. 57

¹Lulwimbo lwa Daudi enyuma we khukhwilukha Saulo mwibina Ee Wele, kholele siisa, sikila ese nilukhila mwiwe, ese nilukhila asi we chindaa chowo, khukhwola nga biise nibio embembeesi eye libuna ewao.

²Ese ndilila Wele owe Angaaki Lukali, Wele owolesianga lilienya liewe khwise.

³Alindeerera buonia khukhwama mwikulu ne khu khumbonia ese, aliambia chisoni abo babanjibwaakala ese. Wele alira khwise busiime bwewe bukhawa tawe ne busuubilifu bwewe.

⁴Basiku bangarire ese, bali nga chitalang'i chilichanga babaandu. Kameeno kabwe kali nga kamafumo ne buembo, chindimi chabwe chili nga chimbalu chinjoki.

⁵Ee Wele, eebwa luyali angaaki we likulu! Lekha luyali lwowo lukaliie khu sibala sioosi.

⁶Basiku base barekekha luriimba khu khundiila ese, ese neunamile khulwe bubeeleli. Bayaba buko khu ngila yase, ne kakhali bakwilemo babeene.

⁷Ee Wele, ese ndi ne lilieyikina likali, ndiimba ne khu khufumia ewe!

⁸Siisimukha ee mwoyo kwase! Siisimukha enywe lituungu ne siilili! Ese ndasiisimusia kamakhelebeende!

⁹Ee Omwami, ese ndakhupila ewe orio akari we chikholo, ese ndakhufumia ewe akari we chikholo.

¹⁰Sikila busiime bwowo bukhawa tawe buli bukali khukhwola mwikulu, busuubilifu bwowo bwoola mu maleesi.

¹¹Ee Wele, eebwa luyali angaaki we likulu! Lekha luyali lwowo lukaliie khu sibala sioosi!