Read lubukusu Chiny. 58 Bible Online

Chiny. 58 - lubukusu bible

Chiny. 58

¹Lulwimbo lwa Daudi Baruki[33] enywe mubisianga kaali ng'ali ku? Mukhalakilanga babaandu boosi mu buluungi ku?

²Tawe! Enywe mwibaasia busa khukhola kamabi, ne khukhola bikholwa bie sisiayuumba mu sibala.

³Babooni bakhola bubwoni khukhwama nga baba munda mwa mawaabwe, bakhola kamabi khukhwama nga ne basaalwa, balomanga ke bubeeyi.

⁴Bali ne buchiba nga buchiba bwe ndemu, baminyaala nga nafwo eyikaale kamaru,

⁵Khwako se eulila kumumilo kwabo baosianga chindemu, namwe lulwimbo lwo mutiili we chindemu omukesikesi tawe.

⁶Ee Wele, pongola kameeno kabwe, ee Wele Omunyali Owa Bioosi, khuula kameeno ke chitalang'i che kamaani!

⁷Lekha baweo nga kameechi ne kateenya, lekha baswalakililwe asi nga bunyaasi mala boome.

⁸Lekha babe nga likhumuniu liwelelela ne liba nga limila, lekha babe nga omwana owibulwa ne afwiile, okhabonakho buwaanga tawe.

⁹Basiulwa nga kamasibaayi ne bakhamanyile tawe, mwirima liewe likali, Wele alibamwaata ne basiili balamu.

¹⁰Baluungi balisangaala nga balibona babooni ne baukuumwa, balibirira mu mafuki ke babooni.

¹¹Babaandu baliloma bali, “Ng'ali baluungi baebwa kumuruuru, Ng'ali Wele ookhalakilanga sibala aliio.”