Read lubukusu Chiny. 59 Bible Online

Chiny. 59 - lubukusu bible

Chiny. 59

¹Lulwimbo lwa Daudi enyuma wa Saulo khuruma babaandu sia nju eya Daudi bamwire. Ee Wele wase, sikule ese khukhwama khu basiku base, ndiinde ese khukhwama khwaabo babanjibwaakala!

²Sikule ese khukhwama khwaabo bakhola bubwoni, mala umbonie khukhwama khu beeri.

³Lola! Banjekhiina banjire, babaandu bakuluumi becha alala khu khunjibwaakala. Ee Wele Omunyali Owa Bioosi, se lili khulwe bubwoni bwase bwosi bwosi namwe bumayaanu nibwo ese kholile,

⁴namwe bubi bwase bwosi bwosi, nio batimeo khukhwerekekha tawe.

⁵Ee Wele Omunyali Owa Bioosi, Wele Owe Bunyali Bwoosi, yinyokha mala oukuume chikholo, okhakholelakho siisa babooni be bubacha tawe!

⁶Buli ekolooba bakobola, baulukhuma nga chimbwa, ne bakeendakeenda mu lukoba.

⁷Rekeeresia bukhomo ne birikhirisio biabwe, chindimi chabwe chili nga chimbalu mu minwa kiabwe, ne eyi bebaasia bali se aliio oulila niko baloma tawe.

⁸Ne kakhali ewe ee Wele Omunyali Owa Bioosi, obachekha, ewe ochekheelela chikholo choosi.

⁹Ee maani kase, ese ndimba khu khufumia ewe, sikila ee Wele, ewe oli bubwilukhilo bwase.

¹⁰Wele wase mu busiime bwewe bukhawa tawe alinjeeta ese, Wele wase alindekha mbone khuulwa khwe basiku base.

¹¹Ee Wele Omunyali Owa Bioosi, omuliindi wefwe, okhabeera tawe, busa babaandu base bakhola bario bebilila, khu maani kowo bakhole batalitaale mala obaule.

¹²Bubwoni buli khu ndimi chabwe, chilomo chabwe choosi chili che bubwoni. Lekha batiilwe mu liebonia liabwe. Mwirima liowo babunie, babunisilie elala, sikila balaama ne khubea, Nio buli mundu alimanya ali Wele aruka mu Isiraeli, alimanya ali buruki bwa Wele buli khu sibala sioosi.

¹⁴Buli ekolooba bakobola, baulukhuma nga chimbwa, ne bakeendakeenda mu lukoba.

¹⁵Bayiiyayiiya khuyiima siakhulia, mala ne bakhekura tawe, baulukhuma.

¹⁶Ne kakhali ese ndimba lukali mu mutikhinyi khufumia busiime bwowo bukhawa tawe. Sikila ewe wabeele omuliindi wase, ne bubwilukhilo bwase mu biise bie butinyu.

¹⁷Ee maani kase, ese ndimba khu khufumia ewe, sikila ee Wele, ewe oli bubwilukhilo bwase, Wele ounjekesianga ese busiime bukhawa tawe.