Read lubukusu Chiny. 6 Bible Online

Chiny. 6 - lubukusu bible

Chiny. 6

¹Nga Sheminiti emba lulwimbo lwa Daudi Ee Wele Omunyali Owa Bioosi, mwirima liowo okhandafwira tawe, namwe wambukuuma mu burafu bwowo tawe.

²Ee Wele Omunyali Owa Bioosi, kholele siisa sikila kamaani kambwele, Ee Wele Omunyali Owa Bioosi, mbonie sikila kumubili kwase kwatekheele.

³Ne samwene ndi mu liaayaaya likali. Ee Wele Omunyali Owa Bioosi, olakhiinda khukhumbonia khu siise sileeyi?

⁴Ee Wele Omunyali Owa Bioosi, lekheelela lirima liowo khwise mala umbonie, khukhila ako, khulwe busiime bwowo bukhawa tawe sikule.

⁵Sikila bafu se bakhukhebulila tawe, se aliio onyala akhufumia ewe emakoombe tawe.

⁶Naluiiliile khulwe sibeela siase, buli ndaalo siilo bulili bwase butora sikila kamasika kase, bulili bwase butekenyala khulwe khulila khwase.

⁷Sikila khulila khwase, se mbona bulayi tawe, chimoni chichuuna khulwe khulila sikila basiku base.

⁸ Ndureo enywe mweesi mukhola kamabi! Sikila Wele Omunyali Owa Bioosi ambulila ese ne musaba buyeeti.

⁹Wele Omunyali Owa Bioosi auliile lisaba liase, khwako alangobosia ese.

¹⁰Basiku base boosi baliambwa chisoni lundi bareenge, sikila chisoni balikoyaana khangu busa mala belukhe.