Read lubukusu Chiny. 60 Bible Online

Chiny. 60 - lubukusu bible

Chiny. 60

¹Lulwimbo lwa Daudi khulwe liliekesia mu biise nibio apana ne Baaramea khukhwama Naharai ne Soba. Yoabu nga akobola enyuma mala eera Baedomu chielefu ekhumi na chibili Mwitooma lia Chumbe Wele, ewe wakhulobile ne khu khuula efwe, ewe wabeele omukhalafu khwifwe, ne kakhali nono khukobolele efwe.

²Ewe wakholile sibala siatereeme, lundi ewe wasiaruuremo, nono yikasia chinjafwa chasio, sikila silikho sikeyukhamo.

³Ewe wakholile babaandu bowo baapwe siibi lukali, efwe khutaalitaala oli ne khumeelile.

⁴Ewe wamanyiisie abo babakhuria ewe, nio banyale khukhwilukha libuna.

⁵Khulwe bunyali bwowo khuonie efwe, khuyeete khulwe lisaba liefwe, nio babaandu nibo ewe wasiima basikulwe.

⁶Wele alomeele Abuundu Atakatifu wewe ali, “Mu bukhili bwase ndiaruramo lukoba lwa Shekemu, mala ngabe babaandu base litooma lia Sukoti.

⁷Kibeati sibala siase, Manase eyase, ekholo eya Efuraimu ekofia yase eye sibia, Yuda eruungu yase eye bubwami.

⁸Sibala sia Moabu sili lucho lwase lwe khusaabilakho, sibala sia Edomu sisiase, ese khupa luyoka lwe bukhili khu sibala sie Bafilisiti.”

⁹Ee Wele, naanu okhambile ese mu lukoba lusire? Naanu oliindangirira ese khucha Edomu?

¹⁰Ee Wele, ewe se wakhulobile efwe tawe ku? Ee Wele, ewe se walobile khucha mwiie ne banamae befwe tawe ku?

¹¹Khuyeete khuule omusiku, sikila buyeeti bwe babaandu se bukhola siindu tawe.

¹²Wele nali lubeka lwefwe khulakhila, alaula basiku befwe.