Read lubukusu Chiny. 62 Bible Online

Chiny. 62 - lubukusu bible

Chiny. 62

¹Lulwimbo lwa Daudi Ese ndindiilila mu liekhaliilikha Wele ambonie, Ese neyikina niye yeng'ene.

²Niye yeng'ene ali lulwanda lwase, lundi ali buonia bwase, niye lukoba lwase lwe bubwilukhilo, ne se ndateremakho tawe.

³Enywe mweesi mwibwaakala omundu khukhwola siise siina? Omundu otaamba kamaani nga lumako lulikho ne lutengaala?

⁴Enywe murekekha khumukwisia niye khukhwama mu lukoosi lwewe. Musangaalila bubeeyi. Mubiita chikhabi emunwa busa, ne kakhali munda mulaama.

⁵Ese ndindiilila mu liekhaliilikha Wele ambonie, ese neyikina niye yeng'ene.

⁶Niye yeng'ene ali lulwanda lwase, lundi ali buonia bwase, niye lukoba lwase lwe bubwilukhilo, ne se ndateremakho tawe.

⁷Buonia bwase ne lukoosi lwase biama khu Wele, niye ali lulwanda lwase lwe kamaani, bubwilukhilo bwase buli mu Wele.

⁸Baandu base, yeyikina mu Wele biise bioosi, boolela Wele butinyu bwenywe bwoosi, sikila niye ali bubwilukhilo bwefwe.

⁹Babaandu boosi bali nga kumuuya busa, babenyalila nende bakhenyalila bafwaanane, se balimo engaanga tawe. Bare khu sikelo, ne se babaamo busiro tawe, bali babaangu khukhila kumuuya busa.

¹⁰Okhara lilieyikina mu siayuumba tawe, okheyikina khunyoola engaanga yosi yosi mu bunuuli tawe, kimiaandu kiowo kiakhatasikha, okhakieyikina tawe.

¹¹Lwe bweeni Wele alomaloma, nauliile kano biise bikali, ndi bunyali buli bwa Wele,

¹² lundi ndi busiime bukhawa tawe buli bubwewe, sikila ewe ee Omwami, oelesia omundu kumuruuru khuloondekhana ne bikholwa biewe.