Read lubukusu Chiny. 66 Bible Online

Chiny. 66 - lubukusu bible

Chiny. 66

¹Lulwimbo lwa Daudi Baandunywe mweesi, fumia Wele ne luyoka lwe khoyo!

²Yiimba luyali lwewe, muelesie efuma eye luyali!

³Boolela Wele muli, “Bikholwa biowo bili bie khuukia! Kamaani kowo kali kamakali po, khukhwola basiku bowo befuliabe ebweeni wowo.

⁴Buli mundu khu sibala akhusaaya ewe, beemba khu khufumia ewe, beemba khufumia lisina liowo.”

⁵Yiicha mubone niko Wele akholile, akholile ke khuukia mu baandu.

⁶ Aakaluukhasia enyanja yaba sisiangalaamwe, bakuuka befwe bakeenda ne khukhwambukha luluuchi. Ebweeneyo khwekhoya sikila niko aakhola.

⁷Mu bunyali bwewe aruka buli lwoosi, ne chimoni chewe chili khu kholo chichiindi. Bareengu khu Wele bakhabao tawe.

⁸Be chikholo enywe mweesi fumia Wele wefwe, lekha khufumia khwenywe kuuliilikhane.

⁹Se alekhile khu khuelesia efwe bulamu tawe, lundi se akhulekhile efwe khuulwe tawe.

¹⁰Sikila ewe, ee Wele, wakhukelile efwe, ewe wakhukelile efwe nga okela efwesa.

¹¹Wakhulekha efwe khwakwa mu lurimba, ne khu khutiuukha efwe busiro bukali.

¹²Ewe walekha basiku bakhuswalakilila efwe, efwe khwapisiibwe siibi oli babaandu bakwile mu mulilo ne kameechi, ne kakhali nono wakhureerire abuundu we kumuleembe.[36]

¹³Ndireera biianwa bibiosie munju mwowo, ndikhukholela niko nelakana khwiwe.

¹⁴Ndikhukholela niko naloma ndi khakhole, nga naba mu butinyu.

¹⁵Ndiaana kamakheese ke khukhwosibwa khu alutare, ndiaana embosio eye chiuunwa ne chimbusi, ne liliisi liliniina mu ngaaki.

¹⁶Enywe mweesi mu mwaria Wele, yiicha mala muulile, ne ndaloma niko akholeele ese.

¹⁷Nasaba Wele lukali khulwe buyeeti, neemba khumufumia niye.

¹⁸Abaanga bali nakisa bubwoni mu mwoyo kwase, andi Omwami se andekeeresia tawe.

¹⁹Ne kakhali ng'ali Wele ambuliile ese, arekeeresie lisaba liase.

²⁰Wele afume, sikila se alobile lisaba liase, namwe se andusiisiekho busiime bwewe bukhawa tawe.