Read lubukusu Chiny. 68 Bible Online

Chiny. 68 - lubukusu bible

Chiny. 68

¹Lulwimbo lwa Daudi Lekha Wele enyokhe basiku bewe basalanile. Lekha abo bababiila Wele belukhe khukhwama ebweeni wewe!

²Nga liliisi ne litamuusibwanga, nono batamuusie bache bulayi bwene nga embuula ne inakulukhaanga ne eli siimbi ne kumulilo, lekha bamayaanu babune ebweeni wa Wele!

³Ne kakhali baluungi basangaala ne khukhwekhoyela ebweeni wewe, bali ne busangaafu lundi bayokela khulwe khoyo.

⁴Yiimbila Wele, yiimba khufumia Wele, rekekhera oyo engila owichila khu mafuumbi.[37] Wele Omunyali Owa Bioosi lili lisina liewe, sangaala ebweeni wewe!

⁵Wele, amenyile mu Lukaangu lwewe Lutakatifu, alelanga bafuubi ne khuliinda banamulekhwa.

⁶Aelesianga be nyuunga lukoba khumenyamo, lundi arangiriranga baboe khubayila mu bulekhuule bwe busangaafu, ne kakhali bareengu balimenya mu siangalaamwe.

⁷Ee Wele, nga ewe ne warangirira babaandu bowo, nga wakeenda wabirira mu siangalaamwe,

⁸ sibala siaterema, mala efula yakwa khukhwama mwikulu, sikila khubao khwa Wele owa Sinai,[38] sikila khubao khwa Wele owa Isiraeli.

⁹Ewe wakila efula yakwa, mala wakobosia engakha mu sibala siowo,

¹⁰babaandu bowo bamenyamo, mu bulayi bwowo waliinda babanani.

¹¹Omwami arusia lilaka mala bakhasi bakali balaangilila likhuwa bali,

¹²“Babaami ne banamae babwe balikho belukha!” Bakhasi engo bakabana nibio banamae banuula mwiie,

¹³bifwaani bie kamauusi bibiamaalwakho efwesa, chindaa chabio chichabakho esahabu chamelamela. (Siina sikila balala khwinywe ne mwekisa mu siko sie kamakheese khu ndaalo eye liie?)

¹⁴Nga Wele Owe Bunyali Bwoosi ne asalanisia babaami eyo, ebarafu yakwa khu Salimoni

¹⁵Sikulu sia Bashani sileeyi lukali, sikulu sie bikulu bikali!

¹⁶Siina sikila ne olola ne siikhalikhali, ewe sikulu sie bikulu bikali, khukhwama khu sikulu [39] nisio Wele arobora amenyekho? Wele Omunyali Owa Bioosi alimenyakho buli lwoosi!

¹⁷Omwami echa Abuundu Atakatifu khukhwama Sinai[40] ne kamakaari ke kamaani chielefu ne chielefu.

¹⁸ Ewe waniina khu sikulu sileeyi, wacha ne baboe bakali, wanyoola biianwa khukhwama khu baandu, akhaba khukhwama khwabo bakhola bureengu, Wele Omunyali Owa Bioosi oole khumenyakho.

¹⁹Fumia Omwami, omwami okhuyeetanga efwe buli ndaalo, ali Wele okhuonianga efwe.

²⁰Wele wefwe ali Wele oonianga, ali Wele Omunyali Owa Bioosi, omwami wefwe, okhusikulanga efwe khukhwama mwifwa.

²¹Wele ng'ali alitubundula kimirwe kie basiku bewe, kimirwe kiaabo babakhayila mu miima kiabwe kie bubwoni.

²²Omwami alomile ali, “Ese ndikobosia basiku benywe khukhwama Bashani, ese ndibakobosia khukhwama mu siba che nyanja,

²³nio enywe munyale khuswala mu mafuki kabwe, mala chimbwa chenywe chinyale khukhoomba sikelo nisio chenya.”

²⁴Ee Wele, babaandu boosi babona likeenda liowo lie bukhili, likeenda lia Wele, omwami wase, ne acha Abuundu wewe Atakatifu.

²⁵Babeemba barangiire, ne bakhupi be kamatuungu bali enyuma, bakhaana bakhupa chitamburini bali akari.

²⁶“Enywe lisaaye lia Yakobo fumia Wele Omunyali Owa Bioosi, fumia Wele mu mukhung'aano kwe babaandu!”

²⁷Benjamini lurangira, lisaaye litiiti lukali, nio babemeelesi ba Yuda ne sipupu siabwe baloondekho, ne enyuma babemeelesi ba Sebuluni ne Nafutali.

²⁸Ee Wele, yekesia bunyali bwowo, bunyali nibwo wekesia sikila efwe,

²⁹noli mu Lukaangu lwowo mu Yerusalemu, niio babaami bakhurerera ewe biianwa.

³⁰Rafwira Misiri, esolo eye mu makoloolwe eyo, rafwira chikholo, lituuli lie chiuunwa ne chimoosi chacho echo, khukhwola boosi bakhurie ewe ne khu khuelesia ewe efwesa yabwe.

³¹Babemeelesi baliicha khukhwama e Misiri, Baesopia balisuta kamakhono kabwe mu ngaaki mwisaba khu Wele.

³²Yiimbila Wele, enywe babaandu be bibala bioosi, yiibila Omwami efuma,

³³yiimbila oyo okeendanga khwikulu, likulu liliabao khukhwama khaale. Rekeeresia khu khokha khwe kamaani khwewe.

³⁴Langilila bunyali bwa Wele, bubwami bwewe buli khu Isiraeli, bunyali bwowo buli mwikulu.

³⁵Wele ali owe khuukia ne ama abuundu wewe atakatifu, Wele owa Isiraeli! Aelesianga babaandu bewe kamaani ne bunyali. Wele afume!