Read lubukusu Chiny. 69 Bible Online

Chiny. 69 - lubukusu bible

Chiny. 69

¹Lulwimbo lwa Daudi Ee Wele, mbonie ese! Sikila kameechi koolile mwikosi mwase.

²Ndikho ngwa mu lutoondoyi, abuundu niio nda sikele tua, nakwiile mu lusiba lwe kameechi, mala bibuli bie kameechi bili siimbi khu khusiikha.

³Naluile lukali khulwe khulila khwase, kumumilo kwase kwekaale. Chimoni chase chaluiliile, khulwe khuliinda buyeeti bwa Wele.

⁴ Abo bakhali ne sifuno sie khu khumbiila ese tawe, bali bakali khukhila lichuune lie khu murwe khwase. Basiku base baloma ke bubeeyi khwise, bali ne kamaani lundi benya khu khunjira. Bambingilila ngobosieyo bibiindu nibio ese kheeba tawe.

⁵Ee Wele, ewe omanyile busilu bwase, ese se nyala nakhukisa ewe bubwoni bwase tawe.

⁶Ee Omwami WELE owe banamae, ese khakila abo bakhweyikina ewe baambwa chisoni tawe. Ee Wele owa Isiraeli, ese khakila abo bakhusaaya ewe bachangalaala tawe.

⁷Sikila ewe Wele niwe okila ne bakhoma ese, niwe okila ne mba ne chisoni chingali.

⁸Ese nabeele nga omukwa khu balebe base, nga okhamanyikhaane khu balebe base tawe.

⁹ Busiime bwase khu Lukaangu lwowo bwechuule mwise, mala bukhomo nibwo bakhukhoma ewe buba khwise.

¹⁰Ese nga neboombia[41] ne khusila siakhulia, bwaba bukhomo khwise.

¹¹Nga nakhola kamakuma kaba chingubo chase, nekela chingacho chabwe.

¹²Ne bali mu baandu baapa chimbakha khwise, lundi bameesi beemba kimienya khwise.

¹³Ne kakhali ese ndikhusaba ewe Wele Omunyali Owa Bioosi, Wele, njeete ese mu biise nibio ewe oroboore. Njeete ese sikila busiime bwowo bukali, sikila ewe okhola nga ne wasuubisia oli olimbonia.

¹⁴Mbonie ese khakwa mu matosi tawe, ndiinde ese khukhwama khu basiku base, khukhwama mu lusiba lwe kameechi.

¹⁵Okhalekha kumukhula kwakhulukusia ese tawe, okhandekha nakwa mu lusiba, namwe neekha emakoombe tawe.

¹⁶Ee Wele Omunyali Owa Bioosi, njeete sikila busiime bwowo bulayi bukhawa tawe, ndole ese khuloondekhana ne siisa siowo sikali.

¹⁷Okhaloba khubonekhela omukholi wowo tawe, sikila ndi mu butinyu khola bwangu khu khunjeeta.

¹⁸Yiicha embi niio ndi, usikule, mbelesie bulekhuule khukhwama khu basiku base.

¹⁹Ewe omanyile nga bakhoma ese, nga banjangalaasia ne khu khufwolobia ese.

²⁰Bukhomo bunjuunia kumwoyo lukali, khukhwola ndaambe lilieyikina. Nenya babakholela ese siisa, ne kakhali se babao tawe, nenya babamboleelesia, ne se nabanyoola tawe.

²¹ Nga enjala yandia, bambelesia esumu ndie, nga naba bulesia, bambelesia endali endulu nywe.

²² Lekha sisiaalwa siabwe sibatiile nga lukili, lekha chinaikara che chimbosio chabwe chibatiile nga luriimba.

²³Lekha chimoni chabwe chitiimbe nio bakhanyala khubona tawe, mala okhole kimikoongo kiabwe kitereme lukali.

²⁴Baweseliekho lirima liowo, lekha lirima liowo libe khu nibo.

²⁵ Lekha abuundu niio bamenyile anjukhwe, okhalekha omundu yesi yesi amenya mu maeema kabwe tawe.

²⁶Sikila bapia siibi oyo niye ewe oukuumile, lundi bachuunia lukali oyo niye ewe wachuunia khale.

²⁷Batase siiukuumo khu siindi Wele, bakhanyoolakho bulekhuule khukhwama khwiwe tawe.

²⁸ Lekha kamasina kabwe karusibwe mu sitabu sie bulamu, bakharwa khu munjolooli kwe kamasina ke babaandu baluungi tawe.

²⁹Ne kakhali ese njuunwa ne khukhweendekhelela lukali, ee Wele, mbukule ese mala umbonie!

³⁰Ese ndiimba lulwimbo khufumia Wele, ese ndilangilila luyali lwewe mu khumupila niye orio.

³¹Lino lilisiimisia Wele Omunyali Owa Bioosi khukhila efwe ne khumuelesia niye ekhaafu, khukhila efwe ne khuaana euunwa ekhulu khuuba embosio.

³²Babapisibwa siibi ne balibona lino, balisangaala. Enywe muyiimanga Wele, lekha kimioyo kienywe kinyoole kamaani.

³³Sikila Wele Omunyali Owa Bioosi aulilanga lisaba lie babanani, ne se ebililanga babaandu bewe baali mu siboe tawe.

³⁴Lekha likulu, liloba, chinyanja, nende buli siindu sie bulamu silimo bifumie Wele.

³⁵Sikila Wele alionia Sayuni, ne khukhwombakha chingoba che sibala sia Yuda lundi, mala bakholi bewe balisibukula ne khumenyamo,

³⁶siliba kumukabwa kwe babaana be bakholi bewe, ne abo babamusiima niye balimenyamo.