Read lubukusu Chiny. 7 Bible Online

Chiny. 7 - lubukusu bible

Chiny. 7

¹Nga Kushi emba lulwimbo nilwo Daudi embela Wele Omunyali Owa Bioosi Ee Wele Omunyali Owa Bioosi, Wele wase, nyoolanga bubwilukhilo bwase mwiwe, mbonie lundi usikule khukhwama khwaabo boosi babandimania.

²Busa basiku base bakhola bario bandabulakamo nga etalang'i kaaba bali se umbonia tawe, mala bakhanjire ne okundi yesi yesi se alibao ousikula tawe.

³Ee Wele Omunyali Owa Bioosi, Wele wase, ese nakholelakho omundu yesi yesi kamabi ku, ese nakholelakho kamabi owasiase oukholelaanga kamalayi ku,

⁴naaba ne nakholela omusaale kamamayaanu[4] mu bweyaangu bwe kamalayi, namwe nakholela omusiku wase kamabi nekhali ne sifuno tawe,

⁵Wele Omunyali Owa Bioosi, naaba bali nakholakho liosi liosi khu kano, lekha basiku base bandimanie mala bandiile, lekha banjire khulwe siikhupo, mala bandekhe asi nefwiile.

⁶Ee Wele Omunyali Owa Bioosi, khulwe burafu bwowo, yinyokha! Yinyokha okhiingilile basiku base be lirima. Ee Wele wase, ewe obisianga nio bung'ali bwikholekha, yinyokha!

⁷Lekha babaandu boosi babuusiane ebweeni wowo, ewe baruke noli mwikulu mu bwami bwowo.

⁸Wele Omunyali Owa Bioosi ali omukhalaki owe babaandu boosi; khalakile khuloondekhana ne buluungi bwase, lundi khalakile khuloondekhana ne bung'ali buuli mwise.

⁹ Wele, ewe oli omuluungi weng'ene, ewe omanyanga kaali mu mebaasio ne mu miooyo kiefwe. Kaania abo baali ne bubwoni bakhakhola bubwoni tawe, mala oindiaasie abo bakhali ne bubwoni tawe.

¹⁰Wele niye engabo yase, aonianga baloonda kamalaka kewe.

¹¹Wele akhalakilanga babaandu mu buluungi, ne buli lwoosi arafwiranga be bubwoni.

¹²Be bubwoni ne bakhekanila tawe, Wele acha khuakala embalu yewe abebwaakale, akhare luembo mu buyiingo bwewe abalase.

¹³Wele arekeekhe bulwaani bwewe bubwira, abasile buembo bwewe bwokiie nga liwa.

¹⁴Lola nga babaandu babi bebaasia khukhola ke bubwoni, balimo kamakhuwa ke bubacha bukali, lundi baboolela babaandu ke bubeeyi.

¹⁵Bayaba liloo babaandu babaandi bakwemo, ne mwiloo elio babeene bakwamo.

¹⁶Bubwoni babwe bubakalukhila babeene, ne sisiayuumba siabwe sibabunia babeene.

¹⁷Khupila Wele Omunyali Owa Bioosi orio lukali, sikila okholanga bung'ali, niimbanga chinyimbo che khufumia Wele Omunyali Owa Bioosi, owe Angaaki Lukali.