Read lubukusu Chiny. 71 Bible Online

Chiny. 71 - lubukusu bible

Chiny. 71

¹Ee Wele Omunyali Owa Bioosi, ese nilukhila mwiwe, okhalekha ese naambwa chisoni tawe!

²Mu buluungi bwowo sikule ese mala umbonie, reka liiru liowo umbulile ese mala umbonie!

³Ba lulwanda lwase lwe bubwilukhilo, lukoba lusire lwe khukhwilukhila[42], sikila ewe oli lulwanda lwase lundi oli bubwilukhilo bwase.

⁴Ee Wele wase, umbonie ese khukhwama mu makhono ke babooni, khukhwama mu bunyali bwe barangani ne bakuluumi.

⁵Sikila ewe, Ee Omwami oli lilieyikina liase. Ee Wele Omunyali Owa Bioosi, lilieyikina liase khukhwama mu buele bwase.

⁶Ese nakhweyikina ewe mu bulamu bwase bwoosi, Ewe waniindile ese khukhwama endaalo niyo nasaalilwakho. Ndikhufumia ewe buli lwoosi.

⁷Bulamu bwase bwabeele likeleka khu bakali, sikila ewe wabeele bubwilukhilo bwase bwe kamaani.

⁸Ese khufumia ewe ne khulangilila luyali lwowo endaalo yoosi.

⁹Mu biise bie bukofu bwase, okhandekha tawe; kamaani kase ne kaweele, okhanjanjukha tawe.

¹⁰Sikila basiku base balomaloma khuloondekhana nase, abo babenya khu khunjira bangwangwanila ese,

¹¹ne baloma bali, “Wele amwanjuukhe, mutimanie mala mu mutiile, sikila omusikula se aliio tawe.”

¹²Ee Wele, okhaba sinaao nase tawe, ee Wele wase, yuuya unjeete!

¹³Lekha abo babanjibwaakala ese baulwe ne khufulafusibwa. Lekha abo bakhaka khu khunjira ese baambwe chisoni ne khuchangalaasibwa.

¹⁴Ese ndira lilieyikina mwiwe buli lwoosi, ese ndikhufumia ewe lundi ndikhufumia.

¹⁵Ndilomaloma khu bikholwa biowo bie buluungi, khu bikholwa biowo bie buonia endaalo yoosi, sikila bili bikali khutuuma bukesi bwase.

¹⁶Ndicha mu maani ko Mwami WELE, ndiboola bulayi bwowo, bubwowo weng'ene.

¹⁷Ee Wele, ewe wanjeyikia ese khukhwama mu buele bwase, ne ese siboola bikholwa biowo bie khuukia.

¹⁸Ee Wele, ese nakofuule lundi ndi ne chimbuchi, okhanjanjukha tawe! Ba nase mu bukesi nibio mboolelamo bunyali bwowo ne kamaani kowo, khu selukho choosi chilibao.

¹⁹Wele, buluungi bwowo bwoola mwikulu. Ewe wakholile bibiindu bie khuukia. Se aliio oli nga ewe tawe.

²⁰Ewe wakholile ese naboone butinyu bukali ne siibi, ne kakhali ewe oliingobosela lundi bulamu, ewe olanjinyosia lundi khukhwama mu lusiba lwe sibala.

²¹Ewe olitasa lukoosi lwase, ne khu khumboleelesia lundi.

²²Ee Wele wase, ng'ali ese ndikhufumia ewe ne lituungu, khulwe busuubilwa bwowo. Omutakatifu owa Isiraeli, ese ndikhwimbila ewe chinyimbo ne siilili siase.

²³Ne niimba chinyimbo che khu khufumia ewe, ndiyokela khulwe khoyo, ndikhwimbila ewe ne kumwoyo kwase kwoosi, sikila wamboniisie.

²⁴Ndilomaloma khu buyeeti bwowo buluungi endaalo yoosi, sikila abo babenya khu khumbuumisia ese, banyoolile chisoni ne khuchangalaasibwa.