Read lubukusu Chiny. 72 Bible Online

Chiny. 72 - lubukusu bible

Chiny. 72

¹Lulwimbo lwa Solomoni Ee Wele, elesia omwami bung'ali bwowo, elesia omwana wo mwami buluungi bwowo!

²Lekha akhalakile babaandu bowo mu buluungi, ne khukhalakila bataambi bowo mu bung'ali.

³Lekha sibala siindiaale lukali, lekha sibemo buluungi,

⁴Lekha ayeete bataambi, lekha asikule babanani, ne khuula kuwanangali.

⁵Lekha omwami amiie siise sileeyi nga enyanga, amiie siise sileeyi nga kumwesi khu selukho choosi!

⁶Lekha omwami abe nga efula mu mikuunda, nga efula echukhiilila liloba.

⁷Lekha buluungi bukuche mu bulamu bwewe, ne buiindia bube kukali po khukhwola nga kumwesi ne kuwao.

⁸ Lekha bubwami bukaliie, khukhwama khu nyanja khukhwola khu kiindi, khukhwama khu luuchi lwa Efurati, khukhwola chimbeka choosi che sibala.

⁹Lekha basiku bewe bamwinamile niye, lekha omwami abaule.

¹⁰Lekha babaami ba Tarishishi nende be bibala bia aleeyi baelesie omwami biianwa, lekha babaami ba Sheba ne Seba bamuelesie niye biianwa.

¹¹Lekha babaami boosi bamwinamile niye, mala chikholo choosi chimukhalaabanile!

¹²Sikila aonianga babanani ne bamusaba niye, aonianga bataambi ne naabo bakhali nende omuyeeti tawe.

¹³Wele akholelanga siisa batekhele ne babanani, lundi aonianga bulamu bwe babanani.

¹⁴Abaonianga khukhwama mu khupisibwa siibi, ne mu siayuumba, ne bulamu bwabwe buli bwe bukhala khu niye.

¹⁵Lekha omwami amenye lukali, lekha aebwe esahabu eya Sheba! Lekha lisaba liaanwe khulwa niye buli lwoosi, lekha Wele abiite omwami chikhabi buli lwoosi!

¹⁶Lekha biakhulia bikali bibe mu sibala, lekha chingulu chichulekho biakhulia nga chingulu chiili Lebanoni. Lekha chingoba chibemo babaandu bakali, bakali nga bunyaasi mu mikuunda.

¹⁷Lekha lisina lio mwami likhebulilwe buli lwoosi, lekha efuma yewe ebeo biise bileeyi nga enyanga. Lekha chikholo choosi chibiitwe chikha khulwa niye, baandu boosi bamulaange bali owabiitwa chikhabi.

¹⁸Fumia Wele Omunyali Owa Bioosi, Wele owa Isiraeli! Niye yeng'ene okholanga kamakhuwa ke khuukia.

¹⁹Fumia lisina liewe buli lwoosi, lekha luyali lwewe lwichule mu sibala siosi. Amina! Amina!

²⁰Kamasaba ka Daudi okhwa Chesi kakamila ano.