Read lubukusu Chiny. 73 Bible Online

Chiny. 73 - lubukusu bible

Chiny. 73

¹Lulwimbo lwa Asafu Ng'ali Wele ali omulayi khu baluungi, khwaabo baali ne kimiooyo kimilayi.

²Ne kakhali ese ne nga khutibia lilieyikina liase, ne nga khutibia lisuubila liase.

³Sikila naba ne likhendekha khu baali ne liliebonia, nga nabona babooni ne bachiililila khuindiaala.

⁴Se bachuunwakho tawe, bali ne kamaani lundi banefu.

⁵Se baapwanga siibi nga babaandu babaandi tawe, se banyoola butinyu nga babaandu babaandi tawe.

⁶Khwako ekibonio eli nga sisiuuma siabwe, sisiayuumba siabafuuma nga engubo.

⁷Kimiooyo kiabwe kiechula bubwoni, ne chinganakani chabwe chili busa khu marekekha ke bubwoni.

⁸Bachekheelela babaandu babaandi, ne khuloma ke bubwoni, bebonia lundi barekekha khu khupia babaandi siibi.

⁹Baloma kamabi khu Wele oli mwikulu, ne bara kamalaka ke kibonio khu baandu mu sibala,

¹⁰nio akhaba babaandu ba Wele babaloondakho, lundi baba khangu khusuubila niko baloma koosi.

¹¹Baloma bali, “Wele amanya ariena? Wele owe Angaaki Lukali se alinyoola bung'ali tawe.”

¹²Babooni bali bario. Bali mu buiinda lundi baindiaala buli lwoosi.

¹³Khuba omuluungi ne khuloba khukhola bubwoni, se khwanjeetilekho siindu tawe.

¹⁴Ee Wele, ewe wandekhile ese nanaanisiibwe biise bioosi, ne khuukuumwa buli mutikhinyi.

¹⁵Abaanga bali naloma kamakhuwa kario, andi se ndi nga mulala khu baandu bowo tawe.

¹⁶Nakhaka khukhwibaasia manye nga butinyu buno buli, ne kakhali khwise bwaba buandalafu lukali.

¹⁷Khukhwola nga nacha mu Lukaangu lwowo. Nio namanya kalinyoola babooni.

¹⁸Ng'ali ewe olibara abuundu we bumiumiu, olibakhola bakwe babune.

¹⁹Babunisibwa khangu, ne khurusibwao elala ne biriisio!

²⁰Ee Omwami, babooni bali nga kamarooro kawaao mu mutikhinyi, ewe ne winyokha, nibo bawao.

²¹Nga neulila bubi mu mwoyo kwase, ne khuchuunisibwa mu mwoyo,

²²naba omusilu lundi omukaafu, naba nga esaang'i ebweeni wowo.

²³Ne kakhaba kario ndi nawe buli lwoosi, ewe undiilanga kumukhono kwase kumuseecha.

²⁴Ewe undangiriranga ese mu mekisio kowo, ne ekhumaliilikha olinjakaanila ne lukoosi.

²⁵Ndi ne naanu mwikulu nokhali ewe? Se siliio khu sibala siosi siosi nisio nikoomba nokhali ewe tawe.

²⁶Kumubili kwase ne kumwoyo kwase binyala biawa kamaani, ne kakhali Wele ali kamaani ke kumwoyo kwase, ali sitonyi siase khulwa mindali.

²⁷Lola abo bakhwanjukha ewe ng'ali bakhabune, ewe olibunia abo bakhali basuubilwa khwiwe tawe.

²⁸Ne kakhali buli bulayi khwise khuba siimbi ne Wele, nakholile Omwami WELE khuuba bubwilukhilo bwase, nio ese mboole koosi niko akholeele.