Read lubukusu Chiny. 74 Bible Online

Chiny. 74 - lubukusu bible

Chiny. 74

¹Lulwimbo lwa Asafu Ee Wele, siina sikila nokhwanjuukhe mindali? Siina sikila lirima liowo ne liburukha busa khu makheese kowo?

²Khebulila babaandu bowo, nibo warobora babe babowo khaale, nibo wasikula khukhwama mu mbaambe babe ekholo yowo wamwene. Khebulila Sikulu sia Sayuni, nikhwo ewe omenyile.

³Tuuma likuunda lino, basiku befwe bonakaake buli siindu sili mu Lukaangu.

⁴Basiku bowo bayokeele khulwe bukhili mu Lukaangu mwowo, Bemeekhemo chipendera chabwe nga bimanyisio bie bukhili.

⁵Baba nga bareenyanga chiikhu, ne barema kimirongooro ne chiaaywa chabwe.

⁶Baremakaka ne kamapango ne chinyundo, buli siindu sisiang'oonwa khukhwama khu misaala.

⁷Bonakaka ne khukhwosia Lukaangu lwowo, banyaalutia abuundu niio ewe osaayilwangao.

⁸Benya khu khuula efwe lukali, boosia buli Abuundu Atakatifu mu sibala.

⁹Bimanyisio bioosi bie bibiindu biefwe bitakatifu se biliio tawe, bang'oosi se baramireo tawe, ne se aliio omanyile kano kaliba kari khu siise buleeyi sina tawe.

¹⁰Ee Wele, basiku befwe bacha khukhuchekha ewe khukhwola siise siina? Balikhukhoma ewe buli lwoosi?

¹¹Siina sikila ne olobile khu khuyeeta efwe? Siina sikila ne okharusia emukoongo kamakhono kowo tawe?

¹²Kakhaba kario ee Wele, ewe wabeele omwami wefwe khukhwama khale, wakhukholeele efwe ke buonia ke khuukia mu sibala.

¹³ Ewe wakabukhasiamo enyanja khu maani kowo, ewe wafuniakaka kimirwe kie kiminaniinga kie mu nyanja.

¹⁴ Ewe watubundula kimirwe kia Lefiatani ewe waelesia chinyama chakwo bibuumbe[43] bie mu sichiimi nga siakhulia.

¹⁵Ewe wakhola chifututusie ne chisebele chabisia kameechi, wakhola chinjichi chimboofu chateenya.

¹⁶Ewe warao biise bie kumuusi ne biise bie siilo, wara enyanga ne kumwesi abuundu wabio,

¹⁷ewe warao chinjakha che sibala, ewe wabaang'ana siimiyu ne kumunaane.

¹⁸Ee Wele Omunyali Owa Bioosi, manya lino, manya nga omusiku akhukhoma ewe, ne basilu nga bafwochola lisina liowo.

¹⁹Okhara babaandu bowo bakhenyalila mu bunyali bwe basiku barafu tawe, okhebilila babaandu bowo babapisibwa siibi tawe!

²⁰Khebulila endakaano yowo, sikila buli abuundu niio sisiilima sili sisiayuumba sikali siliio.

²¹Okhalekha babaapisibwa siibi baambwa chisoni tawe, lekha bataambi ne babanani bakhufumie ewe.

²²Ee Wele, yinyokha, oboole bung'ali bwowo, khebulila nga basilu bakhukhoma ewe biise bioosi!

²³Okhebilila luyoka lwe basiku bowo tawe, sisiayuumba siikhawa nisio basiku bowo benyosia tawe.