Read lubukusu Chiny. 75 Bible Online

Chiny. 75 - lubukusu bible

Chiny. 75

¹Lulwimbo lwa Asafu Ee Wele, khu khupila orio, efwe khu khupila ewe orio! Efwe khuboola nga ewe oli omukali[44] ne khulomaloma khu bikholwa bie khuukia nibio okholile.

²Wele aloma ali, “Nareereo siise sie likhalaka, mala ndikhalaka mu bung'ali.

³Buli sibuumbe siakhaterema, mala sibala siosi siasisiikhwa, ndikhola kimisiingi kiasio kilume.

⁴Mboolela babebonia ndi, ‘Mukhebonia tawe,’ ne babooni ndi, ‘Mukhamela chinjika tawe.’

⁵Mukhamela chinjika lukali, namwe mwakhola sileka tawe.”

⁶Bukhalaki se bwamanga ebukwe namwe mumbo tawe, se bwamanga ebunaswa namwe siafubo tawe,

⁷ne kakhali Wele niye omukhalaki, ekhisia balala ne khuniinia babaandi.

⁸Wele Omunyali Owa Bioosi atiila sikoombe, siechuule endali eyiile eye lirima liewe. Akichukha, mala babooni boosi banywa, bakinywa yoosi khukhwola khwime limaliilisi.

⁹Ne kakhali ese ndiekhoya buli lwoosi, ndiimba mu khufumia Wele owa Yakobo.

¹⁰Alirusia bunyali bwe babooni, ne kakhali bunyali bwe baluungi bulitasikha.