Read lubukusu Chiny. 77 Bible Online

Chiny. 77 - lubukusu bible

Chiny. 77

¹Lulwimbo lwa Asafu Ese ndilila Wele lukali, ndilila Wele lukali nio ambulile.

²Sabanga Omwami mu biise bie butinyu, suta kamakhono kase mwisaba siilo sioosi, ne kakhali se nyoola buoleelefu tawe.

³Nibaasia khu Wele, lundi ndila, nibaasia, lundi fwa kumwoyo.

⁴Wele akhola ese ne mba meeso siilo siosi, neendekheleele lukali, se nyala khulomaloma tawe.

⁵Nibaasia chindaalo chichabira, lundi khebulila kimiiko kie khaale.

⁶Mba mu mebaasio kamakali siilo, nibaasia[45], ne kano niko nireeba ndi,

⁷“Omwami alikhuloba efwe buli lwoosi? Se alikhusiima efwe lundi tawe?

⁸Alekhile khu khusiima efwe? Endakaano yewe se eliio lundi tawe?

⁹Wele ebiliile khuba ne siisa? Lirima limurusiisiemo siisa siewe?”

¹⁰Nio naloma ndi, “Lilinjuunia lukali nilio lino, mbo owe Angaaki Lukali se asiili owe bunyali tawe”

¹¹Wele Omunyali Owa Bioosi, ese ndikhebulila bikholwa biowo bie khuukia, ndikhebulila ke khuukia niko nakhola khaale.

¹²Ndibaasia khu niko okholile kioosi, ndibaasia khu bikholwa biowo bie bunyali.

¹³Ee Wele, buli siindu nisio ewe okhola siili sitakatifu. Wele owe bunyali okundi se aliio nga ewe tawe.

¹⁴Ewe oli Wele okholanga ke khuukia, Wele owekeesie bunyali bwowo akari we chikholo.

¹⁵Waonia babaandu bowo, lisaaye lia Yakobo ne Yosefu, khulwe bunyali bwowo.

¹⁶Ee Wele, nga kameechi kakhubona ewe, kaba ne buuri nga omundu, mala chisiba che nyanja chareenga.

¹⁷Kamafuumbi kakwisia efula, khukukuma khwauliilikha mwikulu, ne chimbeni chameniuukhila chimbeka choosi.

¹⁸Khupapalukha khwe likukuma liowo khwaba mu siifuusia, chimbeni chowo chakhosia khu sibala, sibala siaterema ne khukhwesisiikha.

¹⁹Wabirira mu bibuli, wambukha lusiba lwe nyanja, ne kakhali lukele lwowo se lwabonekha tawe.

²⁰Ewe warangirira babaandu bowo nga omwaayi oloonda bibiaayo khubirira khu bwimeelesi bwa Musa ne Aruni.