Read lubukusu Chiny. 78 Bible Online

Chiny. 78 - lubukusu bible

Chiny. 78

¹Lulwimbo lwa Asafu Baandu base, rekeeresia kamekisio kase, mala muulile niko ndoma.

² Ndikhurumikhira chisimo, ne khukhwinoosia kamakhuwa kakekisa khukhwama khale,

³Kamakhuwa niko khwaulila ne khumanya, kamakhuwa niko bakuuka befwe bakhuboolela efwe.

⁴Se khukhakakise khu baana befwe tawe, ne kakhali khukhakobolele eselukho eyiicha, bikholwa bia Wele Omunyali Owa Bioosi bie efuma ne bunyali bwewe, ne bikholwa bie khuukia nibio akholile.

⁵Aabisia kamalaka khu Baisiraeli, kamalaka khu lisaaye lia Yakobo. Alaka bakuuka befwe, khukhwekisia babaana babwe kamalaka kewe,

⁶nio eselukho eloondakho ekamanye, mala be selukho eya bosi yeyikie babaana babwe.

⁷Mu ngila yino bosi balira lilieyikina liabwe, mu Wele ne khuloba khukhwibilila niko akholile, ne kakhali buli lwoosi barie kamalaka kewe.

⁸Se baliba nga bakuuka babwe tawe, babaandu bareengu lundi be sileka, bakhaba ne lilieyikina likali mu Wele tawe, lundi bakhaba basuubilifu khu niye tawe.

⁹Baefuraimu, ba baaba ne bakangiile buyiingo ne buembo, belukha omusiku biise bie liie.

¹⁰Se baria endakaano yabwe ne Wele tawe, baloba khuloonda kamalaka kewe.

¹¹Bebilila niko Wele akhola, kamaya niko babona ne akhola.

¹² Wele akhola kamaya mu lukoongo lwa Soani mu sibala sia Misiri, bakuuka babwe ne baloleele.

¹³ Abukhasiamo enyanja mala abambusiliamo, aakhola kameechi kaaba nga kamasiisi.

¹⁴ Aruma lifuumbi liabarangirira kumuusi, ne kumulilo kwabarangirira siilo sioosi.

¹⁵ Afutula chinyaanda mu biangalaamwe, ne khubanywesia kameechi kamakali khukhwama asi mu siba.

¹⁶Aakhola chisebele chama mu lwanda, lundi aakhola kameechi keekha nga chinjichi.

¹⁷Kakhaba kario bachiililila khu mukholela bubwoni, ne mu biangalaamwe baaba bareengu khu owe Angaaki Lukali.

¹⁸ Bakhaka Wele mu miooyo kiabwe, mu khuyingilila baebwe biakhulia nibio bekoomba.

¹⁹Beng'ulung'unyila Wele ne baloma bali, “Wele anyala akhuelesia efwe siakhulia mu sichiimi ku?

²⁰Lili ng'ali mbo aapa khu lwanda, mala kameechi katubukhakho kachiririkha, ne kakhali anyala lundi akhuelesia efwe siakhulia, ne khu baandu bewe enyama ku?”

²¹Khwako, Wele Omunyali Owa Bioosi nga aulila, aaba ne lirima likali, kumulilo kwaba khu kholo eya Yakobo, lirima liewe khu Isiraeli liakucha,

²²Sikila se baba ne lisuubila mu niye, lundi se basuubila bali anyala abaonia tawe.

²³Kakhaba kario Wele alaka likulu, ne khukhwikula chinjiki che mwikulu,

²⁴ mala akwiisia mana khukhwama mwikulu nga efula balie, ne khubaelesia siakhulia sie mwikulu.

²⁵Khwako balia siakhulia sie bamalaika, lundi Wele abaelesia bioosi nibio benya.

²⁶Akhola ekhuungu eyama ebukwe yaucha, ne khu bunyali bwewe atasa ekhuungu eye ebunafubo,

²⁷lundi areerera babaandu bewe chinyuni chingali, nga kumuyekhe khu nyanja,

²⁸chinyuni echo chakwa akari we kambi, chaba buli abuundu amaeema kabwe.

²⁹Khwako babaandu abo balia mala bekura, Wele aabaelesia nisio benya.

³⁰Ne kakhali kumwekho kwabwe ne kukhawa tawe, biakhulia ne bisiili mu saya chabwe,

³¹Wele abaambila lirima, mala eera ba baaba be kamaani, ne khumalao baseecha ba Isiraeli balayi.

³²Kakhaba kario bachiililila khukhola bubwoni, akhaba Wele ne akhola ke khuukia se bamusuubila tawe.

³³Khwako akhola bulamu bwabwe bwaba bubwimbi, ne lifwa liabatundubikha.

³⁴Buli nga eera balala khu nibo, babaandi boosi bamukobolela, bekanila ne khumusaaya lukali.

³⁵Bakhebulila bali Wele aaba lulwanda lwabwe, bali owe Angaaki Lukali acha khubasikula.

³⁶Ne kakhali kamakhuwa kabwe koosi kaba ke bubeeyi, se balomakho ka ng'ali tawe.

³⁷ Se baba basuubila khu Wele tawe, se baloonda endakaano yabwe ne Wele tawe.

³⁸Ne kakhali Wele akholela babaandu bewe siisa. Aababeela bubwoni bwabwe, ne se aababunia tawe. Biise bikali ekayila lirima liewe, ne khukhwefwiilisia mu bukhalafu bwewe.

³⁹Akhebulila ali abo bali babaandu busa, mu siangalaamwe, biise bikali babeelesia Wele!

⁴⁰Bakholela Wele bureengu mu siangalaamwe khukhwola khenga ne khumukhola abiyililwe mu sichiimi omwo!

⁴¹Bara Wele mu makhako kamakhabi kamakali, Babeelesia Omutakatifu owa Isiraeli oyo.

⁴²Se bakhebulila bunyali bwewe, namwe endaalo niyo abasikulila khukhwama khu basiku babwe tawe,

⁴³Se bakhebulila endaalo niyo akhola ke khuukia mu Misiri, ne kamaya niko akhola mu ngoongo cha Soani tawe.

⁴⁴ Akaluukhasia chinjichi chaba kamalasile, mala Bamisiri bataamba kameechi ke khunywa.

⁴⁵ Aruma chiisi chababaamo chabanaania, ne chikhele chonakaka kimikuunda kiabwe.

⁴⁶ Aruma chisike khulia biakhulia, ne khukhwonakaka kimikuunda kiabwe.

⁴⁷ Onakaka kimisabibu kiabwe ne kamaarara, ne kimikhuyu kiabwe ne bunyifu bukali.

⁴⁸Areera kamaarara kera chikhaafu chabwe, ne kiminyele kiabwe kiapwa ne chimbeni.[46]

⁴⁹Aabachuunia lukali mu khwekesia lirima ne bukhalafu bwewe, nibio bibiabareerera lifwa.

⁵⁰Se efwiilisia mu lirima liewe, namwe alekha khubeera tawe.

⁵¹ Eera Basoleeli babele be chinju choosi cha Misiri.

⁵² Nio arangirira babaandu bewe nga omwaayi, ne khubabisilia mu siangalaamwe.

⁵³ Abaraangirira mu muleembe, khwako se baria tawe, ne kakhali enyanja yaminya basiku babwe.

⁵⁴ Aabareera mu sibala siewe sitakatifu, khu sikulu nisio anyoola khu maani kewe.

⁵⁵ Atimania chikholo chichiindi charura ebweeni wabwe, abaelesia kamaloba ke chikholo, ne khuelesia Baisiraeli chinju che chikholo.

⁵⁶ Kakhaba kario, bakhaka ne khuba bareengu khuyo owe Angaaki Lukali, ne se baria kamalaka kewe tawe,

⁵⁷ne kakhali bakaloba ne khuba ne sileka nga bakuuka babwe, baba nga buyiingo butiembukha, se beyikinwa tawe.

⁵⁸Baambia Wele lirima nende abuundu aabwe niio be bubeeyi, lundi bamukhalasia ne bifwaani biabwe.

⁵⁹Wele nga abona elio aambwa lirima, khwako alobela babaandu bewe elala.

⁶⁰ Aanjukha enju yewe mu Shilo[47], mu lukoba nilwo amenyanga akari wefwe.

⁶¹ Alekha basiku befwe bakhunuula efwe Lisanduku lie ndakaano, simanyisio sie bunyali ne luyali lwewe.

⁶²Aba ne lirima khu baandu bewe omwene mala alekha, basiku babwe babeera.

⁶³Basoleeli beerwa ne bali mwiie, ne bakhaana se baba nende nibo bachakho mwilia tawe.

⁶⁴Basaayi babwe bafwa khulwe sisiayuumba, ne banamulekhwa babwe se bafukiililwa khusooma tawe.

⁶⁵Ekhumaliilikha omwami enyokha oli owaama mwilo, aaba nga omuseecha owe kamaani owetikita khulwe ndali.

⁶⁶Atimania basiku bewe, aabaambia chisoni cha buli lwoosi.

⁶⁷Aaloba enju eya Yosefu, se aarobora ekholo eya Efuraimu tawe,

⁶⁸ne kakhali aarobora ekholo eya Yuda, sikulu sia Sayuni nisio asiima.

⁶⁹Ombakha Lukaangu lwewe nga lukoba lwewe luli mwikulu, alukhola lwemela elala biise bioosi nga sibala sisiene.

⁷⁰ Aarobora Daudi omukholi wewe, aamurusia mu maayilwe,

⁷¹niio ayaanga kiminyele kie bibiaayo, mala amukhola aaba omwami owa Isiraeli, omwaayi owe babaandu ba Wele.

⁷²Daudi abaliinda ne mu khwerusia ne khubemeelela ne busicha.