Read lubukusu Chiny. 79 Bible Online

Chiny. 79 - lubukusu bible

Chiny. 79

¹Lulwimbo lwa Asafu Ee Wele, Be Chikholo bebwakaale sibala siowo. Banyaalutisie lukaangu lwowo lutakatifu, ne khukhola Yerusalemu khuba likuunda.

²Balekhela chingosia kimilaambo kie babaandu bowo, chisaang'i chilie kimilaambo kie bakholi bowo.

³Bachukha sifuki sie babaandu bowo nga kameechi, kamafuki keekha nga kameechi mu Yerusalemu lwoosi, ne se abao owasikala khusiikha bafu tawe.

⁴Chikholo chichakhubotookhelela efwe chikhukhoma efwe, bachakha ne khukhuseya efwe.

⁵Ee Wele Omunyali Owa Bioosi, khukhwola siise siina? Olaba ne lirima buli lwoosi? Bukhalafu bwe libuba liowo bulaburukha nga kumulilo?

⁶Ra lirima liowo khu kholo chikhakhusaayanga ewe tawe, khu baandu bakhakhusabanga ewe tawe, ne khu baandu be bubwami, bukhakhusaaya ewe tawe!

⁷Sikila beerire babaandu bowo, babunisie sibala siowo.

⁸Okhakhuukuuma efwe khulwe bubwoni bwe bakuuka befwe tawe. Nono khukholele efwe siisa, khwatibiisie lilieyikina liefwe lioosi.

⁹Ee Wele, khulwe lukoosi lwowo wamwene, khuyeete ne khukhuonia efwe, khusikule efwe mala okhubeele bubwoni bwefwe.

¹⁰Siina sikila chikholo chikhureebe efwe chili, “Wele wenywe ali waena?” Lekha efwe khubone ne oukuuma chikholo khulwe khuchukha sifuki sie bakholi bowo.

¹¹Ulila lilila lie baboe, ne khu bunyali bwowo bukali, elesia bulekhuule abo babakhalakilwa lifwa.

¹²Omwami, ruungia chikholo chichiindi kamakhabi kamakali, khulwe bukhomo bwoosi nibwo bareere khwiwe.

¹³Nio efwe, babaandu bowo, kamakheese kowo, khulikhupila ewe orio buli lwoosi, ne khukhufumia ewe biise bibiicha bioosi.