Read lubukusu Chiny. 80 Bible Online

Chiny. 80 - lubukusu bible

Chiny. 80

¹Lulwimbo lwa Asafu, buloli Ee Omwaayi owa Isiraeli, reka liiru, ewe owimelelanga babaandu ba Yosefu nga omwaayi. Ewe oli khu ndebe eye bubwami khu kerubi, yekesia bunyali bwowo,

²ebweeni we chikholo cha Efuraimu, Benjamini ne Manase! Yekesia kamaani kowo mala wiche okhuonie efwe!

³Ee Wele, khwisieo khube nga khwaba! Khukholele efwe siisa, ne khulaona!

⁴Ee Wele Omunyali Owa Bioosi owe bunyali, olasinyikhwa ne kamasaba ke babaandu bowo khukhwola siise siina?

⁵Ewe wakhuelesie efwe sibeela khulie, wakhuelesie kamasika kamakali khunywe.

⁶Ewe walekha chikholo chichakhubotookhelesia chapana khulwe khunyoola sibala siefwe, basiku befwe bakhukhoma efwe.

⁷Wele Owe Bunyali Bwoosi, khwisieo khube nga khwaba! Khukholele efwe siisa, ne khulaona!

⁸Warusia babaandu bowo e Misiri, waoona babaandu Be Chikholo chichiindi, ne khulekhela babaandu bowo sibala siacho.

⁹Nga watimania chikholo chichiindi, babaandu bowo beela mu sibala esio, ne khumalatana mu sibala esio sioosi.

¹⁰Babaandu bowo bamenya mu sibala sioosi, khukhwa ebunaswa mu bikulu bia Lebanoni khukhwola siafubo.

¹¹Babalaaya sibala esio, khukhwama khu nyanja eya Mediterenia, khukhwola khu luuchi lwa Efurati.

¹²Wele owe bunyali, siina sikila ne walekha basiku bebwaakala sibala sie Baisiraeli? Nono Be Chikholo chichiindi becha mu sibala esio, khukhwiba ne khukwonakaka.

¹³Basitula lukali nga chingurwe che mundaa, ne khusionakaka nga chisaang'i.

¹⁴Wele Owe Bunyali Bwoosi, yiicha niio khuli! Ne oli mwikulu lola asi okhubone efwe, yiicha mala osikule babaandu bowo!

¹⁵Yiicha mala osikule babaandu bowo, nibo wareera ne khubakhola baaba, ekholo eye kamaani.

¹⁶Basiku befwe baremakake ne khukhwosia sibala siefwe, mwirima liowo baukuume mala obabunie!

¹⁷Lekhao babaandu nibo warobora mala obaliinde, ekholo niyo wakhola yaaba eye kamaani lukali.

¹⁸Se khulibakho bareengu khwiwe lundi, khuelesie efwe bulamu ne khulikhufumia ewe.

¹⁹Wele owe bunyali, khwisieo khube nga khwaba, khukholele efwe siisa, ne khulaona.