Read lubukusu Chiny. 83 Bible Online

Chiny. 83 - lubukusu bible

Chiny. 83

¹Lulwimbo lwa Asafu Ee Wele, okhasila busa tawe, okheoleelesia busa tawe, okhanyira busa tawe!

²Lola! Basiku bowo benyosie sisiayuumba, ne babakhubiila ewe bakhukholela ewe bureengu.

³Bakwangwaana mu bwikisi khukholela babaandu bowo kamabi, bakwangwaana khukhola kamabi khu baandu nibo ewe oliindanga.

⁴Baloma bali, “Yiicha, lekha khumaleo sibala siabwe, lisina lia Isiraeli likhakhebulilwakho lundi tawe.”

⁵Bakwangwaana khukhola lirekekha liabwe, ne khukhola buambaani khulwe khukhola kamabi khwiwe,

⁶babaandu ba Edomu ne Baisimaeli, babaandu ba Moabu ne Bahakari,

⁷babaandu ba Kebali, Amoni ne Ameleki, ne babaandu ba Filisiti ne Tiro.

⁸Baashuru bosi baambanile nabo, nga bayeeti be kamaani be Baamoni ne Bamoabu, lisaaye lia Lutu.

⁹ Khola khwaabo niko wakhola khu Bamidiani, ne khu Sisera ne Yabini a luuchi lwa Kishoni,

¹⁰Wabaula ne bali a Endori, ne kimilaambo kiabwe kiabolela asi.

¹¹ Khola khu bemeelesi babwe niko wakhola khu Orebu ne Seebu, Ula baruki babwe boosi nga waula omwami Sebari ne Salimuna,

¹²babaloma bali, “Lekha khubukule kamaloba ka Wele kabe kakeefwe.”

¹³Ee Wele, batamuusie nga lutamuusi, ne likhuuchi ne liyilwa ne mbeo.

¹⁴Batimanie nga kumulilo ne kwosia kumusiru nga kumulilo ne kwosia chingulu,

¹⁵batimanie ne mbembeesi yowo, ne khubariisia ne ekhuungu yowo.

¹⁶Ee Wele Omunyali Owa Bioosi, baambie chisoni mala obakhole babone bunyali bwowo.

¹⁷Lekha baambwe chisoni ne khuriisibwa buli lwoosi, lekha babunile mwifwolobia.

¹⁸Lekha bamanye bali ewe weng'ene niwe Wele Omunyali Owa Bioosi, oli owe Angaaki Lukali khu sibala sioosi.