Read lubukusu Chiny. 84 Bible Online

Chiny. 84 - lubukusu bible

Chiny. 84

¹Lulwimbo lwe babaana ba Kora Omwami Owe Banamae, nasiima Lukaangu lwowo lukali!

²Nikoomba khubaamo! Nikoomba khuuba mu Lukaangu lwa Wele Omunyali Owa Bioosi. Fumia khulwe khoyo Wele omenyile mindali ne kumwoyo kwange kwoosi.

³Omwami Owe Banamae, Omwami wase, lundi Wele wase, akhaba nandolia chombakhe siswi, ne opicho chili ne niio chimenya, chilekhanga kamaana kaacho embi nende alutare yowo.

⁴Abo bamenyile mu lukaangu lwowo bali basangaafu lukali, buli lwoosi beemba khu khufumia ewe.

⁵Abo banyoola kamaani kabwe khwiwe bali basangaafu lukali, babekoomba khucha khu sikulu sia Sayuni.

⁶Litooma litakhamo kameechi lia Baka, liekela abuundu we chisebele ne babiriramo, efula eye khunyoa yechusiamo kamatiisi.

⁷Bachiililila khunyoola kamaani ne balikho bacha, balabona Wele owe bawele mu Sayuni.

⁸Ee Wele Omunyali Owa Bioosi ulila lisaba liase, Ee Wele owa Yakobo, rekeeresia.

⁹Ee Wele, biita chikhabi khu mwami wefwe, omwami niye ewe oroboore.

¹⁰Khuba mu lukaangu lwowo endaalo ndala, khukhila chindaalo eelefu ndala abuundu aandi osi osi, Nabulayi nema a silibwa we nju eya Wele wase, khukhila khumenya mu nju che babooni.

¹¹Wele Omunyali Owa Bioosi ali omuliindi wefwe lundi omwami owe luyali, akhubiita efwe chikhabi che siisa ne lukoosi. Se emananga abo bakhola ke buluungi sisiindu silayi siosi siosi tawe.

¹²Omwami Owe Banamae, babeyikina mwiwe bali basangaafu lukali.