Read lubukusu Chiny. 86 Bible Online

Chiny. 86 - lubukusu bible

Chiny. 86

¹Lisaba lia Daudi Wele Omunyali Owa Bioosi, ndekeeresie mala unjeete, sikila ese ndi omutaambi lundi omubanani.

²Mbonie khukhwama mwifwa, sikila ndi omurekeerefu khwiwe, mbonie, sikila ndi omukholi wowo lundi khweyikina ewe.

³Ewe oli Wele wase, khwako kholele siisa, ese khusaaya ewe buli khase.

⁴Ee Omwami, sangaasia omukholi wowo, sikila lisaba liase likhwolela ewe.

⁵Sikila ewe, ee Omwami oli omulayi lundi, oli ne busiime bukhawa tawe khwaabo bakhusaba ewe.

⁶Wele Omunyali Owa Bioosi, rekeeresia lisaba liase, ulila khulila khwase khulwe buyeeti.

⁷Khusabanga ewe mu biise bie butinyu, sikila ewe unjeetanga ese.

⁸Ee Omwami, Wele okundi se aliio nga ewe tawe, se aliio na mulala owakhola niko ewe wakhola tawe.

⁹ Ee Omwami ewe waloonga chikholo choosi, khwako choosi chileekha mala chikhwinamile ne khu khufumia ewe.

¹⁰Sikila ewe oli omukali lundi okholanga ke khuukia, ewe weng'ene niye Wele.

¹¹Wele Omunyali Owa Bioosi, njeyikie niko wenya ese khole, ne ndaloonda kakowo mu busuubilifu, njeyikie khu khukholela ewe mu khwerusia.

¹²Ee Omwami Wele wase, ndikhupila ewe orio kumwoyo kwase kwoosi, lundi ndikhuelesia ewe luyali buli lwoosi.

¹³Sikila busiime bwowo bukhawa tawe khwise buli bukali, ewe wasikuule ese ndi siimbi khufwa.

¹⁴Ee Wele, babaandu be kibonio balikho banjibwaakala, sipupu sie bakuluumi silikho siikhaka khu khunjira, babaandu bakhaulila kakowo tawe.

¹⁵Ne kakhali ee Omwami, ewe oli Wele owe siisa ne busiime, owe liliefwiilisia buli lwoosi, buli lwoosi owe kumwalaalo ne busuubilwa.

¹⁶Ndole mala ukholele siisa, eelesia omukholi wowo kamaani kowo, mala osikule omwana owo mukholi wowo.

¹⁷Wele Omunyali Owa Bioosi, njekesie simanyisio sie bulayi bwowo, abo babambiila ese baliaambwa chisoni, ne babona bali watinyiliisie ne khu khunjeeta.