Read lubukusu Chiny. 89 Bible Online

Chiny. 89 - lubukusu bible

Chiny. 89

¹Lulwimbo lwa Etani Omuesira Ee Wele Omunyali Owa Bioosi, ndiimba biise bioosi khu busiime bwowo bukhawa tawe, ndiboola busuubilifu bwowo buli lwoosi.

²Sikila busiime bwowo bukhawa tawe buliio buli lwoosi, busuubilifu bwowo bwekhwiikhao busa nga likulu.

³Ewe waloma oli, “Nakholile endakaano yase nomurobore wase, nechubile Daudi omukholi wase ndi,

⁴ ‘Ndirao lisaaye liowo buli lwoosi, ne bubwami bwowo khu selukho choosi.’ ”

⁵Ee Wele Omunyali Owa Bioosi, lekha likulu lifumie ke khuukia kowo, lifumie busuubilwa bwowo mwibusiana lie batakatifu!

⁶Wele Omunyali Owa Bioosi, se aliio mwikulu oli nga ewe tawe, mu bibuumbe bie mwikulu se siliio sisiakana nawe tawe.

⁷Oriibwa mu siikhasio sie batakatifu, boosi bakhureengera ewe.

⁸Omwami Owe Banamae, se aliio owe bunyali nga ewe tawe, Ee Wele Omunyali Owa Bioosi, ewe omusuubilifu mu biindu bioosi.

⁹Ewe oula enyanja eye bibuli, bibuli biayo ne binyokha obiyeesia.

¹⁰Ewe watubundulaka ling'u Rahabu[50] mala waliira, waula basiku bowo khulwe kamaani kowo.

¹¹Likulu liowo, sibala sioosi sisiowo, waloonga sibala nende buli siindu siilimo.

¹²Ewe wabaang'ana buli sisiindu siili ebunaswa ne buli sisiindu siili ebunafubo, Sikulu sia Tabori ne sia Herimoni bikhufumia ewe khulwe khoyo.

¹³Bunyali bwowo buli bukali, kamaani kowo kali ke khuukia.

¹⁴Buluungi ne bung'ali bili kimisiingi kie ndebe eye bubwami bwowo, orangiriranga busiime bukhawa tawe ne bubweyikinwa.

¹⁵Babaandu bakhusaaya ewe ne kimienya, abo bamenyile mu buwaanga bwe bulayi bwowo!

¹⁶Bekhoya endaalo yoosi sikila ewe, lundi bakhufumia ewe khulwe bulayi bwowo.

¹⁷Okhuelesianga bukhili bukali, okhukholanga efwe ne khuba bakhili mu busiime bwowo.

¹⁸Sikila engabo yefwe eli eya Wele Omunyali Owa Bioosi, Omwami wefwe wo Omutakatifu owa Isiraeli.

¹⁹Khaale ewe walomalomela mu malola khu mukholi wowo omweyikinwa oli, “Ese nayeetile omunamae owamanyikhana lukali, naanile bubwami khuyo niye narobora khukhwama mu baandu.

²⁰ Nakholile Daudi omukholi wase khuba omwami, mu khumuchukhakho kamafura kamatakatifu.

²¹Kamaani kase kalaba naye buli lwoosi, bunyali bwase bulamukhola abe ne kamaani.

²²Basiku se balimukhila tawe, babooni se balimuula tawe.

²³Ese khape basiku bewe, ne khubunia buli mundu omubiila niye.

²⁴Bubweyikinwa ne busiime bwase bukhawa bucha khuba ne naye, ne khubirira mwise bunyali bwewe bulatasikha.

²⁵Ndikho nja khubalaayia bubwami bwewe, khukhwama khu nyanja eya Mediterenia khukhwola khu luuchi lwa Efurati.

²⁶Daudi akhamboolele ese ali, ‘Ewe oli Paapa wase lundi Wele wase, ewe oli Lulwanda lwe buonia bwase.’

²⁷ Ndimukhola abe omwana wase omusoleeli omubele, omwami owe Angaaki Lukali khukhila be mu sibala boosi.

²⁸Ndimukholela niko namulaka niye biise bioosi, ne ndakaano yase naye elibao buli lwoosi.

²⁹Lisaaye liewe lie bubwami lilibao biise bioosi, omundu owe lisaaye liewe aliba omwami.

³⁰Ne kakhali kaaba bali lisaaye liewe lilekha lilaka liase, ne khuloba khuliloonda,

³¹ne bakhaulila niko mbaboolela tawe, ne khulekha khuloonda kamalaka kase,

³²nio ndibaukuuma khulwe bubwoni bwabwe, ndibapa khulwe bumayaanu bwabwe.

³³Ne kakhali se ndilekha khusiima Daudi, namwe khilwe khumukholela niye niko namulaka tawe.

³⁴Se ndifuna endakaano yase, namwe ngalukhasie likhuwa nilio naloma tawe.

³⁵Nechubile lulala lwong'ene khubirira mwisina liase litakatifu ndi, se ndibea Daudi tawe.

³⁶Aliba ne lisaaye buli lwoosi, lundi ndiliinda bubwami bwewe bubeeo biise bioosi.

³⁷Bulibaao biise bioosi nga kumwesi, kuli nga omuloli omusuubilwa angaaki mwikulu.”

³⁸Ne kakhali ewe waambiile omwami omurobore wowo lirima, ewe wamwanjuukhe lundi wamulobile niye.

³⁹Ewe wekaanile endakaano niyo wakhola no mukholi wowo, ewe wapile asi ekuutwa yewe eye bubwami.

⁴⁰Ewe watechuule kamasiisi ke lukoba lwewe, ne khukhwonakaka chingoba chewe che bubwilukhilo.

⁴¹Babirirao boosi beeba kimiaandu kiewe, bachirani bewe boosi bamuchekheelela.

⁴²Ewe waelesie basiku bewe bukhili, wasangaasiisie basiku bewe boosi.

⁴³Ewe wafusiisie bulwaani bwewe bufu, ne khumulekha aulwe mwiie.

⁴⁴Ewe wamunuulile esiimbo[51] yewe eye bubwami ne khu khuupa asi bubwami bwewe.

⁴⁵Ewe wamukholile akofuule biise biewe ne bisiili, ne khumuambia chisoni chingali.

⁴⁶Ee Wele Omunyali Owa Bioosi, khukhwola siise siina? Olakhwanjukha efwe buli lwoosi? Lirima liowo lilaburukha nga kumulilo khukhwola siise siina?

⁴⁷Khebulile nga bulamu bwase buli bubwimbi, khebulila nga wakhuloonga efwe fweesi khuba babaandu busa!

⁴⁸Naanu onyala amenya mala aaloba khufwa? Omundu anyala ariena ebacha lifwa?

⁴⁹Omwami, busiime bwowo bukhawa tawe bubwama khale, nibwo ewe walaka Daudi mu busuubilifu bwowo buli waena?

⁵⁰Okhebilila nga nilwo ese omukholi wowo khomwa tawe, nga nilwo ese nekhaliilikhila bukhomo bwe babaandu[52] bakhakhusaayanga ewe tawe.

⁵¹Ee Wele Omunyali Owa Bioosi, basiku bowo bakhoma omwami omurobore wowo! Buli niio acha bamukhoma.

⁵²Wele Omunyali Owa Bioosi afume buli lwoosi! Amina Amina.