Read lubukusu Chiny. 9 Bible Online

Chiny. 9 - lubukusu bible

Chiny. 9

¹Lulwimbo lwa Daudi Wele Omunyali Owa Bioosi, ndakhupila orio ne kumwoyo kwase kwoosi, ndaboola kamalayi ke khuukia niko wakhola koosi.

²Ndeemba ne khoyo sikila ewe, Wele owe Angaaki Lukali, ndeemba khukhufumia ewe.

³Nga basiku base baba ne bakhwilukha, bakwa asi mala babuna.

⁴Sikila ewe obisianga bukhalaki mu buluungi, khwako wakhalakiile ese mu bung'ali.

⁵Ewe waukuumile Be Chikholo, lundi wabuniisie bamayaanu, se balikhebulilwa lundi tawe.

⁶Se khulibona basiku befwe lundi tawe, ewe wonakaake chingoba chabwe, ne se aliio olibakhebulila tawe.

⁷Ne kakhali Wele Omunyali Owa Bioosi ali omwami mindali, akhwikhile endebe yewe eye bubwami khulwe bukhalaki.

⁸Mala akhalakila sibala mu buluungi, akhalakila babaandu mu bung'ali.

⁹Wele Omunyali Owa Bioosi ali bubwilukhilo khwaabo babapisibwa siibi, bubwilukhilo mu biise bie butinyu bioosi.

¹⁰Ne abo bakhumanyile ewe balikhweyikina ewe, sikila Wele Omunyali Owa Bioosi, ewe se wanjuukhe abo bakhusaaya tawe.

¹¹Yimba ne khufumia Wele Omunyali Owa Bioosi oruka mu Sayuni! Boolela babaandu Be Chikholo choosi kamalayi niko akholile koosi.

¹²Wele akhebulilanga nibo babi bapia siibi, ayeetanga abo bamumulilakho buli lwoosi, lundi aukuuma abo bakholela baluungi kamabi.

¹³Ee Wele Omunyali Owa Bioosi, njalaale! Lola siibi nisio ndimo sikila basiku base. Ee Wele Omunyali Owa Bioosi, mbonie nio khafwa tawe.

¹⁴Nio khufumie khulwe kamalayi niko ukholeele koosi, khulwe buonia bwowo ndikhoya lukali, ebweeni we babaandu ba Yerusalemu.

¹⁵Babaandu Be Chikholo bakwile mwiloo nilio babeene bayaba, mu lurimba nilwo babeene bareka.

¹⁶Wele Omunyali Owa Bioosi nga akhalakilanga babaandu mu bung'ali omwene ebululiile, be bubwoni bakwa mu ndiimba nicho babeene barekire.

¹⁷Lekha be bubwoni bakobole emakoombe, ne naabo boosi baloba Wele.

¹⁸Wele se akheebilile babaapisibwa siibi tawe, buli lwoosi babanani balieyikina buyeeti bwa Wele.

¹⁹Ee Wele Omunyali Owa Bioosi, yiicha! Okhalekha babaandu bakhuminya ewe tawe! Okhalekha khukhalakila Be Chikholo tawe.

²⁰Ee Wele Omunyali Owa Bioosi, bakhole bakhurie ewe, lekha bamanye bali nga babaandu busa bakhafwe.