Read lubukusu Chiny. 92 Bible Online

Chiny. 92 - lubukusu bible

Chiny. 92

¹Lulwimbo lwe biise bia Sabato Buli bulayi khu khupila orio Wele Omunyali Owa Bioosi, khu khufumia ewe, ee ewe owe Angaaki Lukali.

²Khuboola busiime bwowo bukhawa tawe mu mutikhinyi, ne busuubilwa bwowo siilo,

³ne chinyimbo che biilili, ne kumumilo kwe lituungu.

⁴Ee Wele Omunyali Owa Bioosi, kimilimo kiowo kie bunyali kiasangaasiisie ese, niimba khulwe khoyo sikila niko ewe okholile.

⁵Ee Wele Omunyali Owa Bioosi, kimilimo kiowo kili kie bunyali bukali! Kamebaasio kowo kali kamasiro lukali khwifwe.

⁶Omulendaafu se amanya kano tawe, ne omusilu naye se akaulila tawe,

⁷babooni banyala basisina nga enyoonyi, abo bakhola kamabi banyala baindiaala, kakhaba kario balibunisibwa elala,

⁸sikila ewe, Wele Omunyali Owa Bioosi, oli owe Angaaki buli lwoosi.

⁹Efwe khumanyile khuli basiku bowo bakhafwe, lundi khuli babooni boosi bakhaulwe.

¹⁰Ewe wakholile ese nabeele ne kamaani kamakali nga ke mboongo, wambiitile ese chikhabi che busangaafu.

¹¹Naboone basiku base ne baulwa, lundi nauliile bililo bie babooni.

¹²Baluungi baliba bulayi nga kimikheendu, mala bakhule bulayi nga kimitarakwa kia Lebanoni.

¹³Bali nga kimirongooro kikiabiaalwa munju eya Wele Omunyali Owa Bioosi, nga kimirongooro kimela bulayi mu Lukaangu lwa Wele wefwe,

¹⁴bali nga kimirongooro kichiililila khukhwama kamatuunda, akhaba ne kiangaale lukali, mala kili ne kamaani lundi kikhula bulayi buli lwoosi.

¹⁵Lino liekesia lili Wele Omunyali Owa Bioosi ali owe bung'ali, ali lulwanda lwase, ne mu niye buukhali buluungi se bumulikhoomo tawe.