Read lubukusu Chiny. 94 Bible Online

Chiny. 94 - lubukusu bible

Chiny. 94

¹Ee Wele Omunyali Owa Bioosi, ewe oli Wele oukuumanga, yekesia lirima liowo!

²Ewe oli omukhalaki owe babaandu boosi, yinyokha mala okholele be sileka, niko benyekha bakholelwe!

³Babooni bachiililila khu sangaala khukhwola siise siina? Wele Omunyali Owa Bioosi, bachiililila khukhwola siise siina?

⁴Babi balachiililila khukhola sileka, ne khukhwebonia khulwe kamabi kabwe khukhwola siise siina?

⁵Wele Omunyali Owa Bioosi, babi baapa babaandu bowo, baapia siibi abo baali babowo.

⁶Beera banamulekhwa ne bafuubi, beera ne kamaani bakwa.

⁷Baloma bali, “Wele Omunyali Owa Bioosi se akhubonanga efwe tawe, Wele owa Isiraeli se amanyanga tawe.”

⁸Baandu base, mwamile muriena mwaba basilu balendaafu murio? Khukhwola liina nio mumanye?

⁹Wele aaloonga kamaru kefwe, se anyala aulila tawe ku? Aaloonga chimoni chefwe, se anyala abona tawe ku?

¹⁰Arafwiranga chikholo, se anyala achiukuuma tawe? Niye Omwekesi owe babaandu boosi, se alikho ne bukesi tawe?

¹¹ Wele Omunyali Owa Bioosi amanyile kamebaasio kabwe, amanyile nga kamebaasio kabwe kali ke busilu.

¹²Wele Omunyali Owa Bioosi, omundu niye ewe okaambila ali ne busangaafu, oyo niye ewe weyikia kamalaka kowo!

¹³Omuelesianga siuluukho khukhwama mu ndaalo che butinyu, khukhwola nga ne oukuuma babooni.

¹⁴Wele Omunyali Owa Bioosi se alilekha babaandu bewe tawe, se alianjukha abo bali babewe tawe.

¹⁵Bung'ali bucha khukholekha mu chikoti lundi, ne babaandu baluungi boosi balibufukiilila.

¹⁶Naanu owanjeeta khu khupana ne babooni? Naanu owaba lubeka lwase khu khupana ne babi?

¹⁷Abaanga Wele Omunyali Owa Bioosi se aanjeeta tawe, andi ese nacha khale emakoombe.

¹⁸Naloma ndi, “Ndikho ngwa asi,” ne kakhali ee Wele Omunyali Owa Bioosi, busiime bwowo bukhawa tawe bwandiila.

¹⁹Kumwoyo kwase ne kweendekhelela lukali, liioleelesia liowo lisangaasia.

²⁰Baruki be bubwoni babukula kamabi ne bakarao khubirira mu malaka banyala baambaana nawe ku?

²¹Balecha alala khubunia baluungi, ne khukhalakila lifwa khwaabo bakhali ne bubi tawe.

²²Ne kakhali Wele Omunyali Owa Bioosi abeele lukoba lwase lusire, lundi ali Wele wase, niye ali lulwanda lwase lwe bubwilukhilo.

²³Alibaukuuma ne khubabunia khulwe bubwoni bwabwe, Wele Omunyali Owa Bioosi, Wele wefwe alibabunia.