Read lubukusu Chiny. 96 Bible Online

Chiny. 96 - lubukusu bible

Chiny. 96

¹Yimbila Wele Omunyali Owa Bioosi lulwimbo lukeni! Yimbila Wele Omunyali Owa Bioosi, babaandu boosi mu sibala!

²Yimbila Wele Omunyali Owa Bioosi ne khumufumia! Boola buli endaalo burume bulayi muli Wele akhuonisie efwe.

³Boola luyali lwewe mu kholo, bikholwa biewe bie khuukia mu kholo choosi!

⁴Wele Omunyali Owa Bioosi ali omukali ne akhoya aebwa efuma lukali, akhoya aebwa luyali lukali khukhila bawele boosi.

⁵Sikila bawele Be Chikholo boosi bali bifwaani busa, ne kakhali Wele Omunyali Owa Bioosi aabaang'ana likulu.

⁶Wele ali ne luyali ne bunyali, bunyali ne bulayi bili mu lukaangu lwewe.

⁷ Babaandu boosi be khu sibala, fumia Wele Omunyali Owa Bioosi, fumia luyali ne bunyali bwewe.

⁸Fumia lisina lie luyali lia Wele Omunyali Owa Bioosi, reera siianwa mala mwiche mu lukaangu lwewe.

⁹Yinamila oyo oli Omutakatifu ne abonekha, baandu be sibala mweesi, ba ne liria ebweeni wewe.

¹⁰Boolela chikholo choosi muli, “Wele Omunyali Owa Bioosi niye omwami! Sibala siekhwikhileo ne se sinyala siesisiikha tawe, alikhalakila chikholo mu bung'ali.”

¹¹Lekha likulu lisangaale, lundi lekha sibala siekhoye, lekha enyanja efumie nende bioosi bibiechulamo,

¹²Lekha kamaloba kekhoye, nende buli siindu silimo! Nio kimirongooro kie mundaa kioosi kiliimba khulwe khoyo,

¹³ebweeni wa Wele Omunyali Owa Bioosi, sikila alikho echa, sikila alikho echa khukhalakila sibala. Alikhalakila sibala mu buluungi, ne chikholo mu bung'ali bwewe.