Read lubukusu Chiny. 97 Bible Online

Chiny. 97 - lubukusu bible

Chiny. 97

¹Wele Omunyali Owa Bioosi amiia, lekha sibala siekhoye, lekha bibala bikali bili khu nyanja bisangaale!

²Kamafuumbi ne sisiilima sikali biamubotookheleele, aruka mu buluungi ne bung'ali.

³Wele aruma kumulilo kwewe ebweeni wewe, ne khukhwosia basiku bamubotookheleele.

⁴Chimbeni chewe chikhosia sibala, sibala sibona chimbeni echo mala siterema.

⁵Bikulu binakulukha nga embula ebweeni wa Wele Omunyali Owa Bioosi, ebweeni wo Mwami owe sibala sioosi.

⁶Likulu liekesia buluungi bwewe, ne chikholo choosi chibona luyali lwewe.

⁷Basaayanga bifwaani boosi baambwa chisoni, abo babebonia khulwe bifwaani bitaamba bukhala, bawele Be Chikholo boosi bamwinamila niye.

⁸Ee Wele Omunyali Owa Bioosi, babaandu ba Sayuni basangaalile, ne chingoba che mu sibala sia Yuda chekhoya sikila bukhalaki bwowo.

⁹Ee Wele Omunyali Owa Bioosi, sikila ewe oli owe angaaki, lukali khu sibala sioosi, ewe oli ne luyali lukali khukhila bawele boosi.

¹⁰Wele Omunyali Owa Bioosi asiima abo bababiila bubwoni, aliindanga bulamu bwe batakatifu bewe, abasikula khukhwama mu bunyali bwe babooni.

¹¹Buwaanga buli khu baluungi, ne busangaafu khu balayi.

¹²Enywe mweesi muli baluungi sangaala sikila niko Wele Omunyali Owa Bioosi akholile. Khebulila niko Wele Omutakatifu akholile, lundi mu mupile niye orio.