Read lubukusu Chis. 1 Bible Online

Chis. 1 - lubukusu bible

Chis. 1

¹ Chino chili chisimo cha Solomoni okhwa Daudi, omwami owa Isiraeli:

²Nio babaandu bamanye bukesi ne kamekisio, khumanya kamakhuwa ke bukesi,

³khunyoola kamekisio mu khukhola sikesi, buluungi, bung'ali ne bulekhaane,

⁴nio likanakana lilayi lieelesibwe basilu, ne limanya ne likanakana lilayi khu baele

⁵Omukesi yesi anyala aulila mala atasakho khukhweyika, ne omundu owe limanya anyoole busicha,

⁶nio babaandu bamanye chisimo ne chingano, kamakhuwa ke bakesi ne kiminayi kiabwe.

⁷ Liiria khu Wele Omunyali Owa Bioosi lili lirakikha lie limanya, basilu balekelesia bukesi ne kamekisio.

⁸Ulila, mwana wase, kamekisio ka raraao, ne okhaloba liliekisio lia maao tawe,

⁹sikila kaliba nga liliesaa khumurwe khwowo, lundi nga bibiuma mwikosi mwowo.

¹⁰Mwana wase, kaaba bali bamayaanu bakhuombelesia, okhafukiilila tawe.

¹¹Kaaba bali baloma bali, “Yiicha khuche, lekha khwikise mala khwire omundu, lekha khwibuulile bakhali ne bubi tawe,

¹²nga emakoombe lekha khubamile balamu, bamuufu nga siliindwa ne sikholanga,

¹³Khulanyoola bibiindu bie bukhala, khulechusia chinju chefwe nende nibio khuyaayile,

¹⁴ambaana nafwe, khukhakabane nibio khunyoola.”

¹⁵Mwana wase, okhacha ne nabo tawe, okhengila mu ngila chabwe tawe,

¹⁶sikila bali khangu khukhola kamabi, ne bali khangu khuchukha sifuki.

¹⁷Sikila kumureko ne kurekwa chinyuni ne chiloleeleele, aba kumureko okwo kuli kwa busa.

¹⁸Babaandu bano bekisa khuliinda sifuki siabwe babene, beyibuulilanga babene.

¹⁹Chingila nga chino chiri, chili cha abo boosi banyoola bibiindu mu khurumikhira sisiayuumba, sisiayuumba siiranga bali nasio.

²⁰ Limanya lilililanga khu ngila eye mu lukoba ne kumumilo kwe angaaki, Liniinianga kumumilo kwalio khu soko,

²¹khu ngaaki khwe kamasiisi lilangilila, a miliango kie bilibwa bie lukoba, lilikho lilomaloma:

²²“Ee basilu! Mulachiililila khuba basilu khukhwola liina? Babaandu be khulekelesia balachiililila khusangaalila khulekelesia khwabwe khukhwola liina? Ne basilu khubiyila bukesi?

²³Ulila likololosia liase, lola, ndakhuchukhila kaali mu nganakani chase, nio omanye niko ekhwibaasilia.

²⁴Sikila namulaangile mala mwalobile khurekeeresia, nalaangile ne mbao oundekereesie tawe.

²⁵Ne walekeleesie likaambila liase mala se wafukiililekho likololosia liase tawe,

²⁶ne sesi ndakhuchekheelela ne oli mu butinyu, ndikhukhoma ne onyoolile butinyu,

²⁷nga liaayaaya ne likhutundubikha nga ekhuungu, lundi nga butinyu ne bwicha nga sisiifuusia, nga buchuuni ne butinyu ne bukhwichakho.

²⁸Nio bakhanange ne kakhali se khabakobosie tawe, bakhambiime ne kamaani koosi ne kakhali se bakhanyoole tawe.

²⁹Sikila babiila limanya ne se barobora khuria Wele Omunyali Owa Bioosi tawe,

³⁰se barekeeresia likaambila liase tawe, lundi balekelesia likololosia liase,

³¹khwako balilia kamatuunda ke chingila chabwe, mala bechule kamabi kabwe.

³²Sikila basilu berwa mu khulekelesia, lundi babunisibwa khulwe khulekha khukhwinaana,

³³ne kakhali oyo oumbulila alimenya mu muleembe, ne baliba ne kumuleembe ne se balieendekhelela bubi bubwiicha tawe.”