Read lubukusu Chis. 10 Bible Online

Chis. 10 - lubukusu bible

Chis. 10

¹Omwana omukesi asangaasia raraawe ne kakhali omwana omusilu abelesia maawe.

²Kimiaandu kinyoolwa mu ngila chimbi se kireera bukhala tawe, ne kakhali buluungi busikulanga omundu khukhwama mwifwa.

³Wele Omunyali Owa Bioosi se alekhanga omundu omuluungi aba ne enjala tawe, ne kakhali akhiingilila kuluungo kwo omumayaanu.

⁴Kumukhono kumukara kureera butaambi, ne kakhali kumukhono kwe kamaani kureera buiinda.

⁵Omwana okesa mu siimiyu ali omukesi, ne kakhali omwana okona liilo mwikesa areera chisoni.

⁶Chikhabi chili khu muluungi, ne kakhali kumunwa kwo mumayaanu kwakisa sisiayuumba.

⁷Likhebulila lie baluungi lili ekhabi, ne kakhali lisina lie bamayaanu liliibililwa.

⁸Ooli ne kamakesi aria kamalaka, ne omusilu alibuna.

⁹Okeendela mu buluungi akeenda ne ali ne kumuleembe, Ne kakhali oyo okhali omuluungi tawe alinyoolekha.

¹⁰Okhumiinila emoni areera butinyu, ne oyo owikiicha mu bunyindaafu areera kumuleembe.

¹¹Kamakhuwa ko mundu omuluungi kali esebele eye bulamu, ne kakhali kamakhuwa ko mumayaanu kakisa sisiayuumba.

¹² Libiila lisokosia bulomani, ne kakhali busiime bufuunikha kamabi koosi.

¹³Bukesi bunyoolekhana mu khulomaloma khwo mundu owe limanya, ne kakhali omusilu akhoya apwa.

¹⁴Babaandu bakesi babiikha limanya, ne kakhali litoofwaani lio musilu lireera libuna lia khangu.

¹⁵Kimiaandu kio muiinda, nikio lukoba lwewe lwe kamaani, ne kakhali butaambi bwo mutaambi buli libuna liewe.

¹⁶Kumuruuru kwo muluungi kureera bulamu, ne bukhala bwo mumayaanu bureera bumayaanu.

¹⁷Oyo ofukiilila kamekisio ali khungila eye bulamu, ne kakhali oyo oloba khukololosibwa atiima.

¹⁸Oyo okisa libiila ali omubeeyi, ne oyo obeela babaandi ali omusilu.

¹⁹Kimilomo kimikali se kitaambamo kamamayaanu tawe, ne kakhali oliinda lulimi lwewe ali omukesi.

²⁰Chilomo cho muluungi chili nga efwesa endayi, ne chinganakani cho mumayaanu se chili ne bukhala tawe.

²¹Chilomo cho muluungi chiyeeta bakali, ne kakhali basilu bafwa khulwe khutaamba bukesi.

²²Ekhabi eya Wele Omunyali Owa Bioosi ekhola babaandu baba baiinda, ne Wele Omunyali Owa Bioosi satasakho bubeeleli tawe.

²³Kuli nga kumwinyawe khu musilu khukhola bumayaanu, ne kakhali kimiima kimilayi kisiimisia owe limanya.

²⁴Nisio omumayaanu aria nisio siikhamwichekho, ne kakhali baluungi bakhanyoole nisio bekoomba.

²⁵Sisiifuusio ne sibira omumayaanu auchwa awao, ne kakhali omuluungi aliimila elala.

²⁶Nga endali ne eluluwa khu lulimi, namwe nga liliisi mu moni, ali ario omundu omukara khwaabo babamuruma.

²⁷Khuria Wele Omunyali Owa Bioosi khutasa bulamu, ne kakhali kimiiko kio omumayaanu kikhembiie.

²⁸Lilieyikina lie baluungi likhawele mu busangaafu, ne kakhali lie bamayaanu se liliba siindu tawe.

²⁹Wele Omunyali Owa Bioosi aliinda oyo oli omuluungi, ne kakhali abunia bakhola kamamayaanu.

³⁰Baluungi baliba ne buliindi, ne kakhali bamayaanu se bacha khumenya mu sibala tawe.

³¹Omuluungi aloma ke bukesi, ne lulimi luloma chindabarwa lucha khwakamisibwa.

³²Baluungi bamanyile kakenyekha khulomwa, ne chilomo che bamayaanu chili chindabarwa.