Read lubukusu Chis. 11 Bible Online

Chis. 11 - lubukusu bible

Chis. 11

¹Sikelo sie bubeeyi sisinyisia Wele Omunyali Owa Bioosi, ne kakhali sikelo sia ng'ali simusiimisia.

²Lilielola ne liicha ekhumaliilikha lireera chisoni ne kakhali babeboombia bali ne bukesi.

³Buluungi bwe baluungi bubarangirira, ne bukhiikha bwe bamayaanu bababunia.

⁴Buyiinda se buli ne bukhala mu ndaalo eye lirima tawe, ne kakhali buluungi busikula omundu khukhwama khu lifwa.

⁵Buluungi bwo omundu okhali ne kamabi tawe bukololosia engila yewe, ne kakhali bamayaanu bakhilwa ne bumayaanu bwabwe babeene.

⁶Buluungi bwe baluungi bubasikula, ne kakhali bamayaanu barekwa ne kumuluungo kwabwe.

⁷Omundu omumayaanu ne afwa, afwa ne lilieyikina liewe, ne lilieyikina lio mundu okharia Wele tawe se lili siindu tawe.

⁸Omuluungi asikulwa mu butinyu, ne kakhali omumayaanu engila mu butinyu.

⁹Lilomaloma lio omundu okharia Wele tawe libunia owasie, ne kakhali baluungi basikulwa.

¹⁰Baluungi ne bali bulayi lukoba lusangaala, ne bamayaanu ne babuna babaandu bekhoya.

¹¹Khubirira khu khabi che baluungi lukoba lunyoola lukoosi, ne kakhali lukoba lubunisibwa khulwe chilomo che bamayaanu.

¹²Oyo omochelesia owasie se ali ne bukesi bulayi tawe, ne kakhali omundu owe limanya asila busa.

¹³Omundu osusuuma ne khukuta abuula kamakise, ne oyo oli omusuubilwa akisa likhuwa.

¹⁴Niio bukeleki butaamba sibala sibuna, ne kakhali bakambisi ne bali bakali kumuleembe kubao.

¹⁵Oyo owimeelela niye akhamanyile tawe alikanyoola, ne oyo oloba bubwimeeleli nga obwo aliba ne kumuleembe.

¹⁶Omukhasi omulayi anyoola lukoosi, ne kakhali babaandu be siyubuyubu banyoola kimiaandu kiong'ene.

¹⁷Omundu oli omulayi anyoola bukhala, ne omukuluumi eumisia omwene.

¹⁸Omundu omumayaanu anyoola kumuruungo kwe kubeeyi, ne kakhali oyo omiicha buluungi anyoola kumuruuru kwa ng'ali.

¹⁹Oyo ochiililila mu buluungi alimenya, ne oyo oloonda kamamayaanu alifwa.

²⁰Babaandu be chinganakani chingoyaani bali basinyisia khu Wele Omunyali Owa Bioosi, ne kakhali chingila che baluungi chimusiimisia.

²¹Manya oli omundu omumayaanu alinyoola kumunaanio, ne kakhali abo baali baluungi balisikulwa.

²²Nga embete eye esahabu mu lioolu lie engurwe, ali ario omukhasi owe lukoondo lulayi mala okhali ne limanya tawe.

²³Lilienya lio mundu omuluungi lili lilayi liong'ene, ne lilieyikina lio mumayaanu lireera lirima.

²⁴Omundu mulala ali omuaani, ne kakhali atasa khuba omuiinda, ne okundi emana nisio akhoyeele aane, ne kakhali achiililila khuba omutaambi.

²⁵Omundu omuaani alinyoola buiinda, ne oyo oliisia babaandi aliliisibwa.

²⁶Omundu oloba khukusia biakhulia babaandu bamulaama, ne kakhali babiita chikhabi oyo obikusia.

²⁷Oyo oyiima bulayi ne kamaani ayiima busiime, ne kakhali kamabi keecha khuyo okayiima.

²⁸Owiyikina kimiaandu kiewe alakwa, ne kakhali omuluungi alakhula nga kamasaafu.

²⁹Omundu okubeenga enju yewe salinyoola siindu tawe, ne omusilu aliba nasioobi wo mukesi.

³⁰Bibiaamo bio mundu omuluungi bili kumurongooro kwe bulamu, ne kakhali omukesi asiimisia kimiooyo kie babaandu.

³¹ Kaaba bali baluungi banyoola kumuruungo khu sibala sino, baabi ne bamayaanu balinyoola khukhilao bariena?