Read lubukusu Chis. 12 Bible Online

Chis. 12 - lubukusu bible

Chis. 12

¹Buli yesi yesi owasiima khuukuumwa asiima limanya, ne oyo owabiila khukhwikiichibwa ali omusilu.

²Omundu omulayi asiimisia Wele Omunyali Owa Bioosi, ne kakhali Wele Omunyali Owa Bioosi akhalakila omumayaanu kamabi.

³Omundu se eyombekha khulwe bumayaanu tawe, ne kakhali baluungi se balirusibwao tawe.

⁴Omukhasi omulayi areerera omuseecha wewe lukoosi, ne omuaambia chisoni ali nga bubolo mu makuumba kewe.

⁵Kamebaasio ko muluungi kali ka ng'ali, ne bukeleki bwo mumayaanu buli bwe bubeeyi.

⁶Kamakhuwa ko mumayaanu kali ke libuulila lie lifwa, ne kakhali kamakhuwa ko muluungi kasikula babaandu.

⁷Bamayaanu babunila elala ne se babao lundi tawe, ne kakhali enju yo muluungi elibao.

⁸Omundu abalwa omulayi khulwe bukesi bwewe, ne kakhali oyo owe chinganakani chimbi alekwa.

⁹Nabulayi omundu owe lilieboombia ne khukhwesakulila, khukhila owikhola omuiinda ne kakhali atamba siakhulia.

¹⁰Omundu omuluungi aliinda bulamu bwe bibiaayo biewe, ne kakhali siisa sio omubi sili bukuluumi.

¹¹Olima kumukuunda kwewe alanyoola biakhulia bikali, ne oyiima biikhali bie bukhala tawe ali ne bukesi butiiti.

¹²Bamayaanu bekoomba bukhala bunyoolekha mungila chimbi, ne kakhali siisina sie baluungi siaama.

¹³Omundu omubi arekwa ne bumayaanu bwe lilomaloma liewe, ne kakhali omuluungi ebacha butinyu.

¹⁴Khukhwama mu matuunda ke kamakhuwa kewe omundu anyoola bulayi, anyoola kumuruungo khulwe kimilimo kiewe.

¹⁵Engila yo musilu eli eya ng'ali ebweeni wewe omwene, ne kakhali omundu omukesi arekeeresia likaambila.

¹⁶Khukhalala khwo musilu khumanyikhana khangu, ne kakhali omundu omukesi alekelesia bukhomo.

¹⁷Omundu olomaloma kang'ali arusia buloli bwa ng'ali, ne kakhali omuloli omubeeyi alomaloma bubeeyi.

¹⁸Chilomo che kamayino chiuna nga embalu, ne kakhali lilomaloma lio mukesi lireera buonia.

¹⁹Chilomo cha ng'ali chiindila, ne kakhali bubeeyi buli bwe biise busa.

²⁰Bubeeyi buli mu mwoyo kwabo babebaasia bumayaanu, ne abo barekekha kamalayi bali ne busangaafu.

²¹Mbao libi liliekholekha khu muluungi tawe, ne kakhali bamayaanu bayichula butinyu.

²²Chilomo che babeeyi chili chisinyisia Wele Omunyali Owa Bioosi, ne kakhali abo bakhola kameyikinwa bali esangaalo yewe.

²³Omundu omukesi akisa limanya liewe, ne kakhali basilu balaangilila busilu bwabwe.

²⁴Okhola kimilimo ne kamaani aliamiia, ne kakhali omukara aliba nasioobi.

²⁵Liliembeelela liiba omundu busangaafu, ne kakhali elomo endayi emusiimisia.

²⁶Omundu omuluungi ebacha bumayaanu, ne kakhali engila eye bamayaanu ebatibia babene.

²⁷Omuaayi omukara se areka waamba tawe, ne kakhali omukesi anyoola buiinda bukhasala tawe.

²⁸Khungila eye buluungi bulamu bulikho, ne kakhali engila embi erangirira khucha mu lifwa.