Read lubukusu Chis. 13 Bible Online

Chis. 13 - lubukusu bible

Chis. 13

¹Omwana omukesi aulila raraawe ne amwekisia, ne kakhali owembelekeu se arekeeresia bamurafwira tawe.

²Omundu omulayi anyoola kumuruungo kumulayi khulwe kamakhuwa kewe, ne kakhali liliekoomba lie babeeyi lili sisiayuumba.

³Oliinda lulimi lwewe aliinda bulamu, ne oyo owitwakatwaka alibuna.

⁴Kumwoyo kwo omundu omukara kwikoomba, ne kakhali se kunyoola sisiindu tawe, ne kumwoyo kwoyo okhola kimilimo ne kamaani kunyoola bikali.

⁵Omundu omuluungi abiila bubeeyi, ne omundu omumayaanu akhola chisoni ne bie changalaalo.

⁶Buluungi buliinda oyo oli omuluungi, ne kakhali bumayaanu bubunia.

⁷Omundu mulala ekhola khuba omuiinda khane apuliukha busa, ne okundi ekhola khuba omutaambi khane ali ne kimiaandu kimikali.

⁸Omuyiinda asikulwa ne kimiaandu kiewe, ne kakhali omutaambi se ali ne engila eye khusikulwa tawe.

⁹Buwaanga bwe baluungi bukhosia lukali, ne bamayaanu bali nga etaa elikho esima.

¹⁰Sileka sireera kamayiingamo kong'ene, ne abo bafukiilila likaambila bali bakesi.

¹¹Kimiaandu nikio onyoola khangu kili kiiwa, ne kakhali nikio onyoola kalaa kalaa kilitasikha.

¹²Nisio weyikina ne siayilila silwasia kumwoyo, ne lilienya ne lichusibwa likhwichusia ne busangaafu.

¹³Omundu oleka elomo ereerera libuna omwene, ne kakhali oyo oria lilaka alinyoola kumuruuru.

¹⁴Kamekisio ko mukesi kali esebele eye bulamu, nio kamuyeete akheengila mu mireko kie lifwa.

¹⁵Kamakesi kamalayi kareera lisiima, ne kakhali engila eye bakhali ne lisuubila tawe ebabunia.

¹⁶Mu buli siindu, be bukesi bakhola ne limanya, ne kakhali omusilu okesia busilu bwewe.

¹⁷Omurumwa omubi amwaata babaandu mu butinyu, noyo oli omweyikinwa areera buonia.

¹⁸Butaambi ne chisoni biicha khuyo olekelesia kamekisio, ne kakhali oyo oulila likololosia aebwa lukoosi.

¹⁹Lilienya ne lichusibwa lili bunulu bwe kumwoyo, ne kakhali khulekha kamamayaanu khuli khusinyisia basilu.

²⁰Okeenda ne bakesi aba omukesi, ne kakhali okeenda ne basilu baliumiia.

²¹Butinyu buloonda bamayaanu, ne kakhali khuindiaala khuli kumuruungo kwe buluungi.

²²Omundu omulayi alekha kumukabwa khu bechukhulu bewe, ne kakhali kimiaandu kio mumayaanu kibikhilwanga omuluungi.

²³Kumukuunda kwo mutaambi kwaama biakhulia bikali, ne kakhali biyaywa khubirira mungila chikhali ng'ali tawe.

²⁴Oyo ookhapa omwana wewe ne akholile libi tawe aba amubiila, ne kakhali oyo owamusiima aba khangu khumukololosia.

²⁵Omuluungi alia ekura, ne kakhali omumayaanu aulila enjala.