Read lubukusu Chis. 14 Bible Online

Chis. 14 - lubukusu bible

Chis. 14

¹Omukhasi omukesi ombakha enju yewe, ne kakhali omusilu asambuula enju yewe.

²Oyo okeenda mu buluungi aria Wele Omunyali Owa Bioosi, ne kakhali oyo owe chingila chimayaanu amulekelesia.

³Lilomaloma lio musilu limureerera siikhupo khumukoongo, ne kakhali lilomaloma lie baluungi libaliinda.

⁴Niio chieeyi chikhali mbao siakhulia, ne biakhulia bikali biicha khulwe kamaani ke chieeyi.

⁵Omuloli omweyikinwa se aloma bubeeyi tawe, ne kakhali omuloli omubeeyi, aloma bubeeyi bwong'ene.

⁶Owe sileka akhayiima bukesi se abunyoola tawe, ne kakhali limanya linyoolekhana khangu ne nabo be bukesi.

⁷Lekhana no mundu omusilu, sikila se omunyoolakho kamakhuwa ke limanya tawe.

⁸Bukesi bwo omundu owe bukesi, buli limanya lie ngila yewe, ne kakhali busilu bwe basilu buli bubeeyi.

⁹Wele achekheelela basilu, ne kakhali baluungi banyoola busiime bwewe.

¹⁰Kumwoyo kumwene kumanyile buchuuni bwakwo, mala mbao osaanga mu busangaafu bwakwo tawe.

¹¹Enju eyo mumayaanu elisambuulwa, ne kakhali liiema lio muluungi lililama.

¹² Eliio engila ebonekhana endayi khu mundu, ne kakhali ekhumaliilikha khwayo eli eye lifwa.

¹³Akhaba munjekho kumwoyo kuli ne khukhalala, ne ematabusia we busangaafu buli bubeeleli.

¹⁴Omundu owe chindabarwa, alinyoola kumuruuru kwe chingila chabwe, ne omundu omulayi aliruungwa khulwe bikholwa biewe.

¹⁵Omusilu asuubila buli siindu, ne omukesi aloleelesia niio alikho acha.

¹⁶Omundu omukesi akhola mu khuloleelesia mala alekha bumayaanu, ne kakhali omusilu se ekhiingilila lundi se enaana tawe.

¹⁷Omundu owe lirima akholela bibiindu mu busilu, ne omukesi ekhaliilikha.

¹⁸Basilu banyoola busilu, ne bakesi banyoola limanya.

¹⁹Bamayaanu benamila balayi, ne baabi a bilibwa bie baluungi.

²⁰Omutaambi abiilwa akhaba no wasie, ne omuiinda ali ne basaale bakali.

²¹Oyo olekelesia owasie ali omumayaanu, ne ali ne khabi oyo oli omulayi khu mutaambi.

²²Barekekha kamamayaanu aba se be khiikhile? Abo barekekha kamalayi banyoola buriaani ne bubweyikinwa.

²³Buli mulimo kulimo bukhala, ne kakhali embakha busa ereera butaambi.

²⁴Kumuruuru kwe bakesi kuli kimiaandu kiabwe, ne kakhali busilu bwe basilu buli buiinda bwabwe.

²⁵Omuloli wa ng'ali aonia bulamu, ne oyo olomaloma bubeeyi ali omuchongani.

²⁶Mu khuria Wele Omunyali Owa Bioosi, omundu anyoola lilieyikina, ne babaana bewe baliba ne bumulilo.

²⁷Khuria Wele Omunyali Owa Bioosi khuli esebele eye bulamu, nio wakana omundu anyala ebacha kimireko kie lifwa.

²⁸Luyali lwo mwami luli bukali bwe babaandu bewe, ne ataamba babaandu abuna.

²⁹Omundu okhakhalala khangu tawe ali ne limanya likali, ne oyo owe kumwoyo kwe lirima akaliya busilu.

³⁰Kamebaasio kalaba ne kumuleembe, kakhola kumubili kwaaba kumulamu, ne kakhali likhendekha libosia kamakuumba.

³¹Omiinakilisia omutaambi akhoma owamubuumba, ne kakhali okholela babanani siisa amuelesia lukoosi.

³²Omundu omumayaanu akwa khulwe bikholwa biewe bimayaanu, ne kakhali omuluungi anyoola bubwilukhilo akhaba mu lifwa.

³³Bukesi bwikhala mu mebaasio ko mundu owe liiulila, ne se bumanyikhaane mu mwoyo kwe basilu tawe.

³⁴Buluungi bukaliia sibala, ne kakhali bumayaanu buli chisoni cha buli baandu.

³⁵Omukholi okhola bibiindu sikesi, omwami amusiima, ne kakhali lirima liewe licha khuyo okhola ke chisoni.