Read lubukusu Chis. 15 Bible Online

Chis. 15 - lubukusu bible

Chis. 15

¹Likobosia lilayi liboombia lirima, ne kakhali elomo ekhalafu yinyosia lirima.

²Lilomaloma lie bakesi liekesia limanya, ne kakhali lilomaloma lie basilu liekesia busilu.

³Chimoni cha Wele Omunyali Owa Bioosi chili buli abuundu, chiloleelela balayi ne baabi.

⁴Lilomaloma lilayi lireera bulamu, ne kakhali chindabarwa chonakaka kumwoyo.

⁵Omusilu alekelesia kamekisio ka raraawe, ne oyo oulila khubiiya ali omukesi.

⁶Munju yo muluungi kilimo kimiaandu kimikali, ne kakhali bukhala bwe bamayaanu bureera butinyu.

⁷Chilomo cho mukesi chisalanisia limanya, ne se kali kario khu musilu tawe.

⁸Embosio yo mumayaanu esinyisia Wele Omunyali Owa Bioosi, ne kakhali lisaba lio muluungi lisangaasia Wele Omunyali Owa Bioosi.

⁹Engila yo omumayaanu esinyisia Wele Omunyali Owa Bioosi, ne kakhali Wele Omunyali Owa Bioosi asiima omundu oloonda buluungi.

¹⁰Kumunaanio kumurafu kuli khuyo oloba engila, ne oyo owabiila khukololosibwa alifwa.

¹¹Emakoombe ne Libuna bili khwasie ebweeni wa Wele Omunyali Owa Bioosi, ne aba kimiooyo kie babaandu kili kirio kiriena ebweeni wa Wele Omunyali Owa Bioosi?

¹²Olekelesia se enya khukhwikiichibwa namwe, sanyala acha niio bakesi bali bamukelekela tawe.

¹³Kumwoyo kumusangaafu kukhola omundu amuunamuuna, ne kakhali bubeeleli bubiiyisia kumwoyo.

¹⁴Kumwoyo kwo mundu owe bukesi kuyiima limanya, ne kiminwa kie basilu kilia busilu.

¹⁵Chindaalo cho mundu omutaambi choosi chili chimayaanu, ne kakhali kumwoyo kumusangaafu kuli ne naikara echiililila.

¹⁶Bulayi khuba ne kimiaandu mitiiti mala waria Wele Omunyali Owa Bioosi, khukhila noba ne kimiaandu kimikali mala obe ne butinyu.

¹⁷Buli bulayi khulia siakhulia ne chinyenyi niio busiime buli, khukhila khuliila enyama endayi niio libiila lili.

¹⁸Omundu owe lirima arakikha bulomani, ne kakhali okhakhalala khangu tawe asisia bulomani.

¹⁹Engila eyo mukara yechula kamawa, ne kakhali eyo muluungi eli kumuyila kukwayaasibwa.

²⁰Omwana omukesi asangaasia raraawe, ne kakhali omusilu aleka maawe.

²¹Busilu buli busangaafu khuyo okhali ne bukesi bulayi tawe, ne owe limanya akeenda mungila chindayi.

²²Niio bukeleki bukhali tawe kimipaango kikhiikha, ne kakhali bakambisi bakololosia.

²³Khukhola likobosia lia khangu lili busangaafu khu mundu, ne elomo elomwalomwa mu siise sisienyekhana eli endayi lukali po!

²⁴Engila eyo mundu omukesi emurangirira khucha mu bulamu, nio ebache emakoombe.

²⁵Wele Omunyali Owa Bioosi atechula enju eya oyo owilola, ne kakhali aliinda chinjakha cha namulekhwa.

²⁶Kamebaasio ko mumayaanu kasinyisia Wele Omunyali Owa Bioosi, ne kakhali kamakhuwa ke balayi kamusiimisia.

²⁷Oyo oli ne kumuliuliu kwe khunyoola bibiindu mungila embi areera butinyu khunju yewe, ne kakhali oyo owabiila asoya alimenya.

²⁸Chinganakani cho muluungi chibaasia nga nilwo akobosia, ne kakhali chilomo cho mumayaanu chikhaasa bumayaanu.

²⁹Wele Omunyali Owa Bioosi ali sinaao ne bamayaanu, ne kakhali aulila lisaba lio muluungi.

³⁰Khumuunamuuna khusangaasia kumwoyo, ne kamakhuwa kamalayi kakhukhola weulila bulayi.

³¹Oyo oulila kamekiicho koosi, aliba mulala khu bakesi.

³²Oloba kamekisio eleka omwene, ne kakhali oyo orekeeresia lilikiicha anyoola limanya.

³³Khuria Wele Omunyali Owa Bioosi khuli liliekisio lie bukesi, ne liliboombia lirangirira lukoosi.