Read lubukusu Chis. 16 Bible Online

Chis. 16 - lubukusu bible

Chis. 16

¹Lirekekha lie kumwoyo lili lio omundu, ne kakhali likobosia lie lulimi liama khu Wele Omunyali Owa Bioosi.

²Chingila cho mundu choosi chili chindayi ebweeni wewe omwene, ne kakhali Wele Omunyali Owa Bioosi akela kimiooyo.

³Ra kimilimo kiowo khu Wele Omunyali Owa Bioosi, ne lirekekha liowo likhemisibwe.

⁴Wele Omunyali Owa Bioosi akhola buli sisiindu ne sifuno siasio, akhaba bamayaanu ne ndaalo yabwe eye butinyu.

⁵Buli oyo oli ne sileka asinyisia Wele Omunyali Owa Bioosi, manya oli ng'ali alinyoola siiukuumo.

⁶Khubirira khu buriaani ne bubwiyikinwa bumayaanu bubeelwa, ne khulwe khuria Wele Omunyali Owa Bioosi omundu ebacha bumayaanu.

⁷Chingila cho mundu ne chiba chisiimisia Wele Omunyali Owa Bioosi, akhola akhaba basiku bewe baaba ne kumuleembe ne naye.

⁸Nabulayi obe ne kimiaandu mitiiti mala kia ng'ali, khukhila noba nakio kimikali mala kie bukhalukha.

⁹Omundu akhola kamarekekha kewe mu mwoyo kwewe, ne kakhali Wele Omunyali Owa Bioosi niye obisia koosi.

¹⁰Kamakhuwa ko mwami kali ng'ali burume khukhwama khu Wele, se akhiikha kamakhuwa mu bukhalaki bwewe tawe.

¹¹Sipiimilo ne kamabaale ke khukela ka ng'ali, bili nibio Wele Omunyali Owa Bioosi enya. Bikelo bioosi bili kumulimo kwewe.

¹²Kali kasinyisia khu baami khukhola bumayaanu, sikila endebe eye bubwami yimisibwa ne buluungi.

¹³Chilomo cho omuluungi, chisiimisia Wele Omunyali Owa Bioosi.

¹⁴Lirima lio mwami lili nga barumwa be lifwa, ne omundu omukesi aliliosia.

¹⁵Bubweeni bwo mwami ne buli bulayi bwekesia bulamu, ne lilienya liewe lili nga lifuumbi lie efula eye khubiaala.

¹⁶Khunyoola bukesi buli bulayi khukhila esahabu, khunyoola limanya khukhila khurobora efwesa.

¹⁷Kumukhoosi kwo muluungi kwaukha kamabi, ne oyo oliinda engila yewe aliinda bulamu bwewe.

¹⁸Khukhwilola khureera libuna, ne kumwoyo kwe khukhwibonia kureera likwa.

¹⁹Buli bulayi khuba ne kumwoyo kwe lilieboombia mala obe mulala khu bataambi, khukhila khukabana bie bunuuli ne nabo babebonia.

²⁰Oyo oulila niko ekesebwa aliindiaala, ne ali ne khabi oyo owiyikina mu Wele Omunyali Owa Bioosi.

²¹Oli ne bukesi alaangwa omundu owe limanya, ne lilomaloma lilayi litasa kamaani ke khukhongelesia.

²²Bukesi buli esebele eye bulamu khuyo oli ne nabwo, ne kakhali busilu buli kumunaanio khu musilu.

²³Chinganakani cho mukesi chikhola lilomaloma liewe liaba ne kamaani, ne litasa khukhongelesia.

²⁴Kamakhuwa kamalayi kali nga lisasara lie bubuukhi, kali kamanulu mu mwoyo lundi kali bulamu mu makuumba.

²⁵ Eliio engila ebonekhana endayi khu mundu, ne kakhali ematabusia wayo echa mu lifwa.

²⁶Lilienya lie khulia likila omundu akhola kimilimo, enda yewe ekila akhola.

²⁷Omundu owe sipoli arekekha kamamayaanu, ne lilomaloma liewe lili nga kumulilo kukwosia.

²⁸Omundu owe chindabarwa areera bulomani, ne owe kamakuto aukhasia basaale.

²⁹Omundu owe sisiayuumba aombelesia owasie, mala amuyila mu ngila embi.

³⁰Oyo oupakilisia bisike ali orekekha kamamayaanu, ne oyo okisa kamakhuwa akila bubi bwekholekha.

³¹Chimbuchi khu murwe chili ekuutwa eye luyali, chinyoolekhana mu limenya liluungi.

³²Oyo okhakhalala khangu tawe akhila owe kamaani, ne oyo oliinda kumwoyo kwewe akhila ouula lukoba.

³³Chikura chipwa, ne kakhali khubisia khuli khwa Wele Omunyali Owa Bioosi.