Read lubukusu Chis. 17 Bible Online

Chis. 17 - lubukusu bible

Chis. 17

¹Nabulayi khulia kumukaati kumwoomu ne kumuleembe, khukhila enju elimo naikara alala ne bulomani.

²Nasioobi omukesi aliamiia omwana omwenengo okhola bibiindu bie chisoni, ne alinyoola kumukabwa nga mulala khu bawandaaye.

³Enyuungu eye mu mukuba eyengusia efwesa ne sisioosio nasio siyengusia esahabu, ne Wele Omunyali Owa Bioosi akhaka kimiooyo.

⁴Omumayaanu arekeeresia kamamayaanu, ne omubeeyi arekeeresia chilomo che bubeeyi.

⁵Oyo ochekheelela omutaambi akhoma owabuumba omutaambi oyo, ne osangaalila butinyu bwo kundi alinyoola kumunaanio.

⁶Babechukhulu bali busangaafu bwe bakukawe, bulayi bwene nga basoleeli ne basangaalila bararaawabwe.

⁷Omusilu sanyala aloma chilomo chindayi tawe, ne buli busilu bukali khuboolela omwami bubeeyi.

⁸Asoya eli nga kamaya khuyo okiaana, aindiaala mu buli nisio akhola.

⁹Oyo obeela owasie kamabi ayiima busiime, ne kakhali oyo okhebusia kakabira onaka busaale.

¹⁰Omundu omukesi aulila lilikiicha, khukhila omusilu, akhapwa chingumi emia.

¹¹Omundu omumayaanu ali omureengu buli lwoosi, ne omurume omurafu alirumwa khumubunia.

¹²Nabulayi omundu akaanana ne sibulukhu siikhasi sinuulilwe babaana basio, khukhila ne akaanana ne omusilu mu busilu bwewe.

¹³Omundu aaba ne aruungia kamabi khulwe kamalayi, bumayaanu se buliwa munju mwewe tawe.

¹⁴Lirakikha lie bulomani lili nga ne wikula emoni eye kameechi, nono lekha kamayiingamo bulomani ne bukharakikha tawe.

¹⁵Oyo obeela owe kamabi, ne noyo okhalakila bubi omuluungi, boombi bali basinyisia Wele Omunyali Owa Bioosi.

¹⁶Sikila siina omusilu abe ne chirupia che khukula bukesi, ne mala se ali ne limanya tawe?

¹⁷Omusaale akhusiima biise bioosi, ne wandaayo akhuyeeta mu biise bie butinyu.

¹⁸Omundu okhali ne bukesi bulayi tawe, emeelela owasie mwikobi.

¹⁹Omundu owasiima bumayaanu asiima bulomani, ne wefumia buli lwoosi aba olikho wereerera libuna.

²⁰Omundu owakoyaana munganakani se aindiaala tawe, ne owe lulimi nende owe chilomo chindabarwa akwa mu butinyu.

²¹Omwana omusilu ali bubeeleli khu raraawe, ne raraawe wo musilu se ali ne busangaafu tawe.

²²Kumwoyo kumusangaafu kuli kamalesi kamalayi, ne kumwoyo kwe bubeeleli kwomia bikuumba.

²³Omundu omumayaanu afukiilila khurusia asoya, khukoyaania chingila che bung'ali.

²⁴Omundu owe limanya ayiima bukesi, ne kakhali chimoni cho musilu chiaayaaya chimbeka choosi.

²⁵Omwana omusilu ali bubeeleli khu raraawe, ne ali buchuuni khu maawe.

²⁶Khuruungia omuluungi se buli bulayi tawe, ne khulacha omukoosi lili libi.

²⁷Omundu oliinda lilomaloma liewe ali owe limanya, ne oyo oli ne kumwoyo kukhakhalala khangu tawe ali omundu owe liiulila.

²⁸Omusilu ne asila anyala ebaasibwa khuba omukesi, ne akhalomaloma tawe ekesia limanya.