Read lubukusu Chis. 19 Bible Online

Chis. 19 - lubukusu bible

Chis. 19

¹Nabulayi omundu omutaambi mala omweyikinwa, khukhila omundu omusilu olomaloma chindabarwa.

²Se buli bulayi omundu khutaamba limanya tawe, ne okhekhaliilikha tawe anyoola butinyu.

³Busilu bwe babaandu bukila babuna, ne kakhali enyuma wako bekiicha Wele Omunyali Owa Bioosi.

⁴Kimiaandu kireera basaale bakali, ne kakhali omundu omutaambi anjukhwa ne basaale bewe.

⁵Omuloli omubeeyi alinyoola kumunaanio, ne oyo olomaloma ke bubeeyi se alibacha tawe.

⁶Bakali benya bulayi bwo mundu omuaani, ne buli mundu ali omusaale owo mundu oaana biianwa.

⁷Bawandaaye bo mutaambi boosi bamubiila, aba basaale bewe balamwibaayakho bariena! Abayiima khulwe khubekoonjelela ne se abanyoola tawe.

⁸Onyoola bukesi esiima omwene, ne oyo oliinda limanya aliindiaala.

⁹Omuloli omubeeyi alinyoola kumunaanio, noyo olomaloma bubeeyi acha khubuna.

¹⁰Se buli bulayi omusilu amenya limenya lie liteende tawe, bulayi bwene nga nasioobi ne akhakhoyeele amiia babaami tawe.

¹¹Bukesi bulayi bukhola omundu aba kalaa khuaambwa lirima, aba kuli kumukabwa kwewe khubeela kamabi.

¹²Burafu bwo mwami buli nga liulukhuma lie etalang'i, ne bulayi bwewe buli nga luume khu bunyaasi.

¹³Omwana omusilu ali libuna khu raraawe, ne omukhasi owe lung'uunyo ali nga efula namunyekeele.

¹⁴Enju ne kimiaandu bili nibio omundu anyoola khukhwama khu raraawe, ne kakhali omukhasi owe bukesi ama khu Wele Omunyali Owa Bioosi.

¹⁵Bukara bureera liilo lisiro, noyo owikhala busa enjala emulia.

¹⁶Oliinda lilaka aliinda bulamu bwewe, ne olekelesia kamakhuwa alifwa.

¹⁷Oyo oli omulayi khu bataambi ekopia Wele Omunyali Owa Bioosi, Wele Omunyali Owa Bioosi alimuruunga khu sikholwa siewe.

¹⁸Ukuuma omwana wowo lilieyikina ne lisiiliio, okhamuloleelela busa ne alikho atiba tawe.

¹⁹Lekha omundu owe lirima likali aruunge kumuruungo, sikila wamusikula aba olimusikulanga buli lwoosi.

²⁰Rekeeresia kamakaambila mala ofukiilile kamekisio, ne ekhumaliilikha onyoole bukesi.

²¹Omundu ali ne kamarekekha kamakali, ne kakhali lili khulwe lilienya lia Wele Omunyali Owa Bioosi nio kemisibwa.

²²Lilienyekhana mu mundu lili bubwiyikinwa, ne omundu omutaambi akhila omubeeyi.

²³Ria Wele Omunyali Owa Bioosi ne olayindila, oyo oria Wele Omunyali Owa Bioosi, aba ne kumuleembe, butinyu se bulimunyoola tawe.

²⁴Omukara aroonga kumukhono kwewe mu sibuumba, ne kakhali akhaba ekhuyila emunwa se anyala tawe.

²⁵Khupa omunywanywa ne omusilu aleyikilakho bukesi, kaambila owe bukesi ne alanyoola limanya.

²⁶Oyo owinyosia sisiayuumba khu raraawe ne khuoona maawe, ali omwana oreera chisoni ne khurusiao lukoosi.

²⁷Mwana owase, ne olekha khurekeeresia kamekisio, aba olaukha khukhwama khu makhuwa ke limanya.

²⁸Omuloli owe sipoli afwochola bukhalaki bwa ng'ali, ne chilomo che bamayaanu chili chimayaanu.

²⁹Bukhalaki bwalindiilila banywanywa, ne siikhupo khu mikoongo kie basilu.