Read lubukusu Chis. 20 Bible Online

Chis. 20 - lubukusu bible

Chis. 20

¹Kamalwa kali bukhomo ne bumeesi kamaaya, noyo niye katiimia se ali omukesi tawe.

²Lirima lio mwami liriisia lili nga khuulukhuma khwe etalang'i, oyo omukhalasia omwene ereerera lifwa.

³Luli lukoosi omundu ne ekaana bulomani, ne kakhali buli omusilu asiima khulomana.

⁴Omukara salima mu siise sisienyekha tawe, ne kakhali mu siise sie likesa akhayiime mala salinyoola siindu tawe.

⁵Sifuno sie munganakani cho omundu sili nga kameechi ke mu lusiba, ne kakhali omundu owe limanya alichinyoola.

⁶Babaandu bakali befumia bali bali babeyikinwa, ne kakhali omundu omweyikinwa anyoolekhana waena?

⁷Omundu omuluungi akeenda mungila chinuungi, bali ne chikhabi babaana bewe enyuma wewe.

⁸Omwami owikhala khu ndebe eye bukhalaki, aseesa bumayaanu bwoosi ne chimoni chewe.

⁹Naanu onyala aloma ali, “Nasiinga kumwoyo kwase kuli kumumiliiu, se ndi ne bumayaanu tawe?”

¹⁰Busiro ne bikelo biikhali ng'ali tawe bili bifwaanane, bioombi bisinyisia Wele Omunyali Owa Bioosi.

¹¹Akhaba omwana amanyikhana khulwe bikholwa biewe, bikholwa biewe ne bili bilayi namwe biibi.

¹²Liiru ne emoni, Wele Omunyali Owa Bioosi niye owabikhola.

¹³Okhasiima liilo tawe busa olanyoola butaambi, khola kimilimo ne olaba ne siakhulia sikali.

¹⁴Omukuli aloma ali, “Se sili silayi tawe, se sili silayi tawe,” ne kakhali nga arekukha ebonia.

¹⁵Eliio esahabu ne kamabaale kamakali ke bukusi bwe angaaki, ne kakhali chilomo che limanya chili limili lie bukusi bwe angaaki.

¹⁶Bukula engubo eyo mundu owimeelela omukeni, ne khupa kumusiingo oyo owimeelela omureende.

¹⁷Biakhulia binyoolekhanila mu bubacha bili binulu khu mundu, ne kakhali ekhumaliilikha mukhanwa mwewe mukhechule chimbaale.

¹⁸Kamarekekha kemisibwa ne bukeleki, ne khulwe likaambila lie bukesi khupana liie.

¹⁹Omundu owe kamakuto abuululila ke mu bwikisi, khwako okhaambaanakho no mundu owitwakatwaka sisilu tawe.

²⁰Olaama raraawe namwe maawe, aliba nga etaa esima mu siilima simali ti.

²¹Kimiaandu kinyoolekha khangu khangu mu khunyoa, ekhumaliilikha se kikhabe kie chikhabi tawe.

²²Okhaloma oli, “Kane niyache bubi” tawe, lindiilila Wele Omunyali Owa Bioosi ne alikhuyeeta.

²³Bikelo biikhali bie abwene tawe bili bisinyisia khu Wele Omunyali Owa Bioosi, ne chikiilo che bubeeyi chili chimbi.

²⁴Likeenda lio mundu lirangirirwa ne Wele Omunyali Owa Bioosi, ne nono omundu anyala amanya engila yewe ariena?

²⁵Kuli kumureko khu mundu khulaka siianwa sitakatifu khangu khangu, mala asikanakanekho enyuma we khukhwechuba.

²⁶Omwami omukesi aseleecha bamayaanu, mala abaelesia kumunaanio mala se abakholela siisa tawe.

²⁷Etaa eya Wele Omunyali Owa Bioosi eyiima mumwoyo kwo mundu, emenieelesia koosi kaali mukari mwewe.

²⁸Bung'ali ne bubwiyikinwa biliinda omwami, ne ndebe yewe eye bubwami yimisibwa ne buluungi.

²⁹Luyali lwe basoleeli baele luli kamaani, ne kakhali lukoondo lulayi khu basaakhulu luli chimbuchi chabwe.

³⁰Chinguumi chiuumisia chisiinga bumayaanu, ne bukhupe khusiinga mwibili mwoosi.