Read lubukusu Chis. 21 Bible Online

Chis. 21 - lubukusu bible

Chis. 21

¹Kumwoyo kwo mwami kuli nga luluuchi mu makhono ka Wele Omunyali Owa Bioosi, akuyila niio enya.

²Buli engila eyo mundu eli eya ng'ali mumoni chewe, ne kakhali Wele Omunyali Owa Bioosi apiima kumwoyo.

³Khukhola buluungi ne bung'ali, lisiimisia lukali Wele Omunyali Owa Bioosi khukhila embosio.

⁴Chimoni chichiibonia ne kumwoyo kwe khukhwelola, etaa eyo mumayaanu bili bumayaanu.

⁵Lirekekha lie bakesi lireera bikali, ne kakhali buli mundu oli khangu anyoola kumutaambo.

⁶Khunyoola kimiaandu khulwe bubeeyi, khuli nga namufweli.

⁷Sisiayuumba sie bamayaanu silibeera, sikila baloba khukhola kang'ali.

⁸Engila yo mubi yakhiikha, ne kakhali kimiima kio mukwalaafu kili kia ng'ali.

⁹Nabulayi wamenya khulusuli lwenju, khukhila munju embalaayi no mukhasi nalung'uunyo.

¹⁰Kumwoyo kwo mumayaanu kwikoomba kamabi, se ali ne siisa khu wasie tawe.

¹¹Owe sienyameeno naukuumwa omusilu akesiya, omukesi ne ekisibwa anyoola limanya.

¹²Wele Omuluungi aloleelela enju eyo mumayaanu, mala ekhumaliilikha amubunia.

¹³Owikala kamaru kewe alekhe khuulila lilila lie bataambi, yesi alilila ne mbao olimurekeeresia tawe.

¹⁴Siianwa sieebwa mu bwikisi sikhiingilila lirima, ne asooya ekisiibwe mungubo eosia burafu bukali.

¹⁵Bung'ali ne bwikholekha buli ekhoyo khu baluungi, ne kakhali buli bubi khu bamayaanu.

¹⁶Omundu orura khukhwama khu ngila eya ng'ali, alinyoolekhana ne akonile mu bafu.

¹⁷Omundu owasiima binulunulu alaba omutaambi, nosiima endali ne kamafura se aliindiaala tawe.

¹⁸Omundu omumayaanu anyoola siiukuumo nisio omuluungi akhanyoola tawe, ne okhali ne lisuubila anyoola siiukuumo nisio owa ng'ali akhanyoola tawe.

¹⁹Nabulayi khumenya mu sisiangalaamwe, khukhila khumenya no mukhasi owe lirima ne lung'uunyo.

²⁰Libiikhilo lie bukhala binyoolekha munju yo mukesi, ne kakhali omusilu asalanisia bioosi nibio ali nabio.

²¹Oyo oyiima buluungi ne bulayi, alinyoola bulamu ne lukoosi.

²²Omundu omukesi anyala ebwaakala lukoba lwe babaandu be kamaani, ne khukwiisia lisiisi nilio beyikina.

²³Oyo owiyaya kumunwa kwewe ne chilomo chewe, eliinda khukhwama mu butinyu.

²⁴“Owe sienyameeno” lili lisina lio mundu owelola, oweniinia mala okhola biindu mu sileka.

²⁵Liliekoomba lio mukara limwiira, sikila se enya khukhola kimilimo tawe.

²⁶Omumayaanu ekoomba endaalo yoosi, ne kakhali omuluungi aana ne se emana tawe.

²⁷Embosio eyo mumayaanu eli esinyisia, ne aba eli esinyisia lukali po kaaba bali akireera ne lilibaasia libi!

²⁸Omuloli omubeeyi alibuna, ne kakhali chilomo cho omundu omuriani chilichiililila khufukiililwa.

²⁹Omundu omumayaanu ekholesia, ne kakhali owa ng'ali aloleelesia chingila chewe.

³⁰Mbao bukesi, limanya namwe likeleka linyala liakhila Wele Omunyali Owa Bioosi tawe.

³¹Efarasi erekekhwa khulwe ndaalo eye liie, ne kakhali bukhili buli bwa Wele Omunyali Owa Bioosi.