Read lubukusu Chis. 22 Bible Online

Chis. 22 - lubukusu bible

Chis. 22

¹Lisina lilayi likhoya liaroborwa khukhila kimiaandu kimikali, ne bulayi bukhila efwesa namwe esahabu.

²Omuyiinda no omutaambi balekhaana, Wele Omunyali Owa Bioosi owababuumba boombi.

³Omundu omukesi abona busiku mala ekisa, ne kakhali omusilu abwingilamo mala aumiia.

⁴Kumuruuru kwe lilieboombia ne khuuria Wele Omunyali Owa Bioosi, kuli buiinda, lukoosi ne bulamu.

⁵Kamawa ne kimireko kili khu ngila yo mundu owakoyaana, owiliinda omwene akatalaanda.

⁶Yekesia omwana nga nilwo anyala amenya, mala ne aliba omukhulu se alilekha limenya elio tawe.

⁷Bayiinda bamiia bataambi, ne owekopa ali nasioobi khuyo owamwekopia.

⁸Omundu obiaala kakhali ng'ali tawe alikesa butinyu, ne esiimbo yewe eye lirima elikhilwa.

⁹Omundu omuaani alinyoola chikhabi, sikila alia siakhulia siewe ne bataambi.

¹⁰Timania owe sienyameeno ne bulomani buliwao, lundi khu khuupana ne khukhomana khuliwa.

¹¹Oyo osiima bukwalaafu bwe kumwoyo, mala ali ne lilomaloma lilayi omwami aliba omusaale wewe.

¹²Chimoni cha Wele Omunyali Owa Bioosi chiliinda limanya, ne kakhali arusiao kamakhuwa ko mubeeyi.

¹³Omundu omukara aloma ali, “Etalang'i eli enje! Ndeerwa khu ngila.”

¹⁴Kamakhuwa ko mukhasi omueeyi kali liloo lileeyi, oyo niye Wele Omunyali Owa Bioosi aambila lirima alikwamo.

¹⁵Busilu buli mu mebaasio ko mwana, ne kakhali ne alachwa kumukhomwa busilu bumururamo.

¹⁶Oyo onaania omutaambi namwe oaana biianwa khu baiinda, nio atase buiinda bwewe alichiililila khukhwekoomba.

¹⁷Reka liiru liowo mala oulile kamakhuwa ke bakesi, rumikhira kamekisio kase,

¹⁸sikila bulaba bulayi waaba ne okabiikha mu mwoyo kwowo, mala okarumikhire koosi.

¹⁹Nio lilieyikina liowo libe mu Wele Omunyali Owa Bioosi, lino nilio ndikho khwekesia ewe luno.

²⁰Se nakhuandikiile ewe chisimo kamakhumi kataru, che khukhurafwira ewe ne khukhuelesia limanya,

²¹khukhwekesia ewe buluungi ne bung'ali, nio oaane likobosia lia ng'ali khwaabo babakhuruma?

²²Okhanuula omutaambi sikila ali omutaambi tawe, namwe okhamumiinakilisia mu kooti tawe,

²³sikila Wele Omunyali Owa Bioosi alibasoola, alinuula abo babanuula.

²⁴Okhasiimana ne omundu owe lirima tawe, namwe okhakeenda no mundu omukhalafu tawe.

²⁵Okhola orio weyika chingila chewe, mala wera wamwene mu mureko.

²⁶Okhaba mulala khwaabo balaka ne khukhwiyama, khukhwimeelela babaandi mu makobi tawe.

²⁷Waaba ne okhali nende nisio oruunga tawe, balikhubukula akhaba bulili bwowo nibwo okonakho.

²⁸Okharusiao lulwakha lukhale, nilwo bakuuka benywe baraao tawe.

²⁹Sobona omundu owe bukesi bukali mu milimo kiewe? Oyo aliima ebweeni we babaami, se aliima ebweeni we babaandu busa tawe.