Read lubukusu Chis. 23 Bible Online

Chis. 23 - lubukusu bible

Chis. 23

¹Ne wikhala asi khulia no mwami, loleelela bulayi siina siili ebweeni wowo.

²Yeliinda wamwene, waaba noli owe lulie.

³Okhekoomba biakhulia biewe binulu tawe, sikila bili biakhulia bie siiomelo.

⁴Okhafwilikhana khunyoola kimiaandu tawe, ba omukesi mala onyalikhe.

⁵Ne osiloleelela kimiaandu kiowo kiwao khangu, kipurukha busa nga kiimelile chindaa, kipurukha nga efuruusi ne eniina mungaaki.

⁶Okhalia siakhulia sio mundu we chinge tawe, okhekoombakho binulunulu biewe tawe,

⁷Sikila ali nga oloma ali “Lia mala onywe!” Ne kakhali kumwoyo se kulikho alala ne nawe tawe.

⁸Olirusia nibio oliile, mala otibie kamakhuwa kowo ke khumupila orio.

⁹Okhalomaloma ne omusilu tawe, sikila kane afwochole kamakhuwa kowo ke bukesi.

¹⁰Okhenyosiao lulwaakha lukhale tawe, namwe okhengilila kamaloba ke bafuubi tawe.

¹¹Sikila Omusikuli wabwe ali ne kamaani, alibasoola khukhwama khwiwe.

¹²Rekeeresia kamekisio, mala weyike kamakhuwa ke limanya.

¹³Okhalekha khuukuuma omwana tawe, sikila wakhamulacha ne lusaala se afwa tawe.

¹⁴Nomuchila lusaala olionia bulamu bwewe, khukhwaama emakoombe.

¹⁵Mwana wase waaba omukesi, seesi ndisangaala;

¹⁶kumwoyo kwase kuliekhoya, waaba nolomaloma ka ng'ali.

¹⁷Okhafukiilila kumwoyo kwowo kwa bubila bamayaanu tawe, ne kakhali ria Wele Omunyali Owa Bioosi buli lwoosi.

¹⁸Mu ng'ali liliio lilieyikina lie limenya lie biise bibiicha, ne lilieyikina lino se likhonakwe tawe.

¹⁹Ulila, mwana owase, mala obe omukesi, mala ore kamebaasio kowo khu ngila eya ng'ali.

²⁰Okhaambaana ne banywa kamalwa kamakali tawe, namwe be lulie lwe enyama tawe,

²¹sikila omumeesi nende owe lulie baliba bataambi, mala ekhumaliilikha balifwara bitasi.

²²Rekeeresia raraao owa khusaala, mala okhalekelesiakho maao nali omuloosi tawe.

²³Kula bung'ali, ne okhabukusia tawe, kula bukesi, kamekisio ne limanya.

²⁴Raraawe owo muluungi alikhoya lukali, noyo osaala omwana omukesi alimwikhoyela.

²⁵Lekha raraao ne maao basangaale, lekha maao owakhusaala ekhoye.

²⁶Mwana wase ndekeeresie, mala loonda chingila chase.

²⁷Sikila omueeyi ali liloo lileeyi, ne omukhasi owe sifwaabi ali nga esebele eye lusiba.

²⁸Omukhasi nga oyo ebuulila nga omunuuli, mala akhola be siseecha bakali balekha khuba basuubilwa.

²⁹Naanu oli ne butinyu? Naanu oli ne bubeeleli? Naanu owe bulomani? Naanu owilung'uunya? Naanu oli ne kamakuma kakhali ne sifuno tawe? Naanu orwakhile chimoni?

³⁰Abo babekhala siise sileeyi ne banywa endali, abo banywa endali niyo batubaniisie.

³¹Okhalola khu ndali ne eli embesemu tawe, ne elikho ebiitakila mu mwendo, ne yiikha bulayi emumilo tawe.

³²Ekhumaliilikha eluma nga endemu, eluka nga endemu eye buchiba.

³³Chimoni chowo chilibona bibiindu bikeni, ne olilomaloma chindabarwa.

³⁴Oliba nga okonile akari we nyanja, nga oreengeechela khu mulapa kwe meeli.

³⁵Oliloma oli, “Bakhupile ne se naumiie tawe, bakhupile ne se naulilakho tawe. Kane ninyokhe liina mbiime endali ekiindi?”